Ո՞րն է ճշմարտությունը՝ շոկոլադն օգտակար է, թե վնասակար մաշկի համար։ Մաշկաբան Հովհաննես Հովհաննիսյանը մանրամասնում է՝ ամեն բան կախված է շոկոլադի տեսակից ու օգտագործման չափից։
«Սև շոկոլադը (70%+ կակաոյով) պարունակում է հակաօքսիդանտներ՝ ֆլավոնոիդներ, որոնք կարող են
- բարելավել արյան շրջանառությունը,
- որոշ չափով պաշտպանել մաշկը արևից,
- նույնիսկ լավացնել մաշկի որակը։
Սակայն սա վերաբերում է բարձրորակ մուգ շոկոլադին, ոչ թե կաթնային կամ շաքարով գերհագեցած տեսակներին։
Շաքարով հագեցած շոկոլադը խթանում է ինսուլինի բարձրացումը, ինչը ակտիվացնում է անդրոգենները, և արդյունքում
- ավելանում է սեբումի արտադրությունը (մաշկային ճարպ),
- կարող են առաջանալ բորբոքային բշտիկներ,
- ակնեն (պզուկներ) կարող են սրվել։
Շոկոլադը երբեմն պարունակում է նաև կաթնային սպիտակուցներ, որոնք նույնպես կարող են ազդել հորմոնալ հավասարակշռության վրա որոշ մարդկանց մոտ։
Հետևաբար՝ պնդել, որ շոկոլադը առաջացնում է պզուկներ՝ միֆ է։ Բայց ասել, որ այն երբեմն սրում է որոշ մարդկանց մոտ՝ փաստ։
«Քաղցրը՝ շոկոլադով կամ առանց, պետք է լինի քանակով։ Ձևով էլ՝ որքան ավելի մուգ, այնքան ավելի լավ։ Ոչ ոք չի մահացել շոկոլադ չուտելով։ Բայց այ մաշկը՝ մի լավ փչացրել են՝ չսահմանափակելով այն»,-ամփոփում է մասնագետը։