Մայիսի 20-21-ը ՌԴ ԱԳ նախարար Սերգեյ Լավրովը աշխատանքային այցով կայցելի Երևան։ Այցի մասին հայտնում է ՌԴ ԱԳՆ կայքը։
ՀՀ ԱԳՆ մամուլի խոսնակ Անի Բադալյանը Factor.am-ի հետ զրույցում ասել է, որ Լավրովի՝ Հայաստան այցի մասին արդեն տեղեկացրել են։ Բադալյանը չհայտնեց՝ արդյո՞ք Սերգեյ Լավրովը մայիսի 21-ին է Երևան գալու։ Արտգործնախարարության խոսնակը միայն ասել է՝այցի մանրամասների մասին կտեղեկացնեն։
Ըստ ՌԴ ԱԳՆ կայքի՝ նախատեսված են նրա հանգամանալի բանակցությունները ՀՀ արտաքին գործերի նախարար Արարատ Միրզոյանի հետ, ինչպես նաև զրույցներ վարչապետ Նիկոլ Փաշինյանի և նախագահ Վահագն Խաչատուրյանի հետ։
«Շփումները տեղի կունենան 2024 թվականի հոկտեմբերի 8-ին ամենաբարձր մակարդակով ձեռք բերված պայմանավորվածությունների զարգացման, ինչպես նաև հունվարի 21-ին Արարատ Միրզոյանի Մոսկվա կատարած այցից արդյունքների մասով։ Օրակարգը ներառում է երկկողմ համագործակցության հարցերի լայն շրջանակի քննարկում, եվրասիական ինտեգրացիոն կազմակերպության շրջանակներում փոխգործակցության և միջազգային հարթակներում, առաջին հերթին՝ ՄԱԿ-ում դիրքորոշումների համաձայնեցումը: Արտաքին քաղաքականության գերատեսչությունների ղեկավարները մտքեր կփոխանակեն տարածաշրջանային անվտանգության հարցերի, այդ թվում՝ հայ-ադրբեջանական և հայ-թուրքական հարաբերությունների կարգավորման գործընթացների շուրջ։ Նախատեսվում է 2025-2026 թվականների միջգերատեսչական խորհրդակցությունների պլանի ստորագրում։ Սերգեյ Լավրովը Ռուս-հայկական համալսարանում կխոսի ռուսական բուհերի մասնաճյուղերի դասախոսների, ուսանողների և փորձագիտական հանրության հետ, իսկ Ռուսական տանը կհանդիպի նաև հայրենակիցների հետ։
Ավանդույթի համաձայն՝ ծաղիկներ կդրվեն Անմար կրակի մոտ՝ Անհայտ զինվորի գերեզմանին, ծաղկեպսակ կդրվի Հայոց ցեղասպանության զոհերի հուշահամալիրում։
Մոսկվան ակնկալում է, որ այցը կնպաստի Ռուսաստանի և Հայաստանի միջև քաղաքական և միջգերատեսչական երկխոսության ամրապնդմանը և կհանգեցնի փոխըմբռնման մեծացմանը և կողմերին հետաքրքրող հարցերի փոխադարձ ընդունելի լուծումների որոնմանը»,-ասված է հաղորդագրությունում։