Հարություն Հակոբկոխյանը եւ Մանվել Պետրոսյանը նվաճեցին Եվրոպայի չեմպիոնի կոչումը

Սպորտի կառավարման կենտրոնում՝ նախկին «Միկա» մարզահամալիրի դահլիճում բռնցքամարտի Եվրոպայի 23 տարեկանների ու երիտասարդների առաջնությունն ավարտվեց:

Ռինգը վերջինը տրամադրվեց 23 տարեկան տղաների եզրափակչի մասնակիցներին, որտեղ Հայաստանն ուներ ութ մասնակից: Մեր տղաներից այս տարիքային խմբի Եվրոպայի չեմպիոն դարձան 63,5 կգ քաշային Մանվել Պետրոսյանը եւ 71 կգ քաշային Հարություն Հակոբկոխյանը:

Մանվելը դաժան մենամարտում, որի ընթացքում երկու մրցակիցներն էլ դեմքի վնասվածքներ ստացան, առավելության հասավ ռուսաստանցի Եգոր Կոզորեզովի նկատմամբ:

Չեմպիոնությունը հեշտ չտրվեց նաեւ Հարությունին: Նա նույնպես համառ ու անզիջում պայքարում պարտության մատնեց կրկին Ռուսաստանը ներկայացնող Զայպուլաեւին եւ առաջին անգամ նվաճեց Եվրոպայի չեմպիոնի կոչումը: Ընդ որում, Հարությունը, որ լեգենդար Իսրայել Հակոբկոխյանի որդին է, ճանաչվեց նաեւ առաջնության լավագույն բռնցքամարտիկ ու պարգեւատրվեց հատուկ գավաթով:

Հայաստանն այս տարիքային խմբում ունեցավ 2 ոսկի, 6 արծաթ եւ 5 բրոնզ:

Այսպիսով, Հայաստանի թե երիտասարդական, թե 23 տարեկան տղաների եւ աղջիկների հավաքականները թիմային հաշվարկում գրավեցին 2-րդ տեղը՝ զիջելով միայն Ռուսաստանի Դաշնության թիմերին:

Եվրոպայի առաջնությունը Երեւանում լավագույնս կազմակերպելու համար EUBC-ն հատուկ պարգեւ շնորհեց Հայաստանի բռնցքամարտի ֆեդերացիայի նախագահ Հովհաննես Հովսեփյանին:

Աշոտ ՀԱԿՈԲՅԱՆ