Այսօր կայացավ «Ազգային համագործակցության կլոր սեղանի» երրորդ նիստը, որի մասնակիցները քննարկեցին եւ տեսակետներ ու առաջարկներ արտահայտեցին «Վարչապետի աթոռ զբաղեցնողը կոռուպցիոն հանցախմբի ղեկավարն է» թեմայով:
ԱԺԲ խորհրդի անդամ Արա Պապյանը Aravot.am-ի հետ զրույցում ասաց. «Ինչպես նախկիններում, այսօր պետք է քննարկենք հրատապ հարցեր: Նաեւ հարցեր, որոնք ունեն ավելի ռազմավարական նշանակություն: Ռազմավարական հարցերից պիտի քննարկենք Սահմանադրության վերաբերյալ եղած առաջարկները, որ իշխանությանը ներկայացվել են տարբեր ժամանակաշրջաններում, եւ դրանք անտեսվել են: Մենք պիտի ցույց տանք, որ այս իշխանությունը, խոսելով ժողովրդավարության մասին, հակաժողովրդական է եւ խախտում է բազմաթիվ օրենքներ:
Պիտի անդրադարձ լինի վերջին իրադարձություններին: Մասնավորապես, Հայ Առաքելական եկեղեցու դեմ շարունակվող ոտնձգություններին, որոնք շղարշվում են իբրեւ թե օրինականության հաստատում եւ այլն, բայց խորքի մեջ ունեն հակազգային եւ հակաեկեղեցական բնույթ: Եվ դա, ցավոք, զուգորդվում է Բաքվի, Անկարայի եւ այլոց պատվերներին:
Բնականաբար, նաեւ այլ առաջարկներ կլինեն, որոնք կքննարկենք այստեղ»:
Արա Պապյանը նշեց, որ այս Կլոր սեղանի քննարկումների ընթացքում ավելանում են քաղաքական, հասարակական ուժերը: «Գալիս են ուժեր, որ միանում են, ուժեր կան, որ չեն մասնակցում: Չմասնակցելն անպայման անհամաձայնության նշան չէ: Մեր խնդիրն է՝ ունենալ միջուկ, առանցք, որի շուրջ կլինի մտքերի փոխանակում, որովհետեւ հասկանալի է, որ իշխանությունը օգտագործում է իր բոլոր լծակները բոլորի դեմ: Եվ դրան կարելի է հակակշռել ժողովրդավարական ձեւով որոշակի համախմբվածությամբ: Դա չի նշանակում, որ Կլոր սեղանի շուրջ նստած բոլոր մարդիկ կիսում են բոլոր խնդիրները, մոտեցումները:
Հիմնական սկզբունքը հետեւյալն է՝ քննարկել այն հարցերը, որոնք բոլորի համար մտահոգիչ են եւ ընդհանուր են: Մասնավորապես, առաջին հանդիպումը նվիրված էր Սահմանադրության փոփոխության պարտադրանքին դրսից: Մենք բոլորս կողմ ենք Սահմանադրության փոփոխությանը եւ ունենք մոտեցումներ: Բայց մենք չենք ընդունում արտաքին ուժերի կողմից դրա պարտադրանքը եւ այդ բոլոր քայլերի համաձայնեցումը թշնամու հետ»,-ասաց Կանադայում ՀՀ նախկին դեսպանը:
Մեր հարցին, թե որոշ քաղաքական ուժեր այժմվանից պատրաստվում են 2026 թվականին կայանալիք համապետական ընտրություններին: Եթե չկա համընդհանուր միախմբում, Հայաստանում իշխանափոխություն հնարավո՞ր է, Արա Պապյանը պատասխանեց. «Եթե նայում ենք նախադեպերին, ցավոք սրտի նման նախադեպ չի եղել: Հայաստանում երբեք ընտրության միջոցով իշխանություն չի փոխվել՝ ներառյալ Նիկոլ Փաշինյանի օրոք: Երբ ասում են այսքան քվե ստացած ընտրյալ վարչապետ, ինքը քվե ստացել է, երբ արդեն կես տարի վարչապետ էր, ինչպես, օրինակ, ժամանակին Քոչարյանը, որն արդեն կես տարի նախագահ էր: Կամ, ինչպես սովետական շրջանում Գերագույն Սովետի պատգամավոր ընտրված Լեւոն Տեր-Պետրոսյանն էր: Այսինքն, նախադեպերը բացասական են: Մենք ամեն ինչ պետք է անենք, որպեսզի նախադեպը ստեղծենք: Իշխանություն էլ դիմում է ամեն տեսակ անօրինական միջոցների:
Ըստ էության, տեղի է ունեցել կուսակցության, ես կասեի՝ մեկ անհատի կողմից Հայաստանում իշխանության զավթում: Սա Նյուրնբերգում ամենամեծ մեղադրանքն էր նացիստական կուսակցությանը: Շատերին թվում է, թե հիմնական մեղադրանքը հոլոքոստն է եղել: Ոչ: Եղել է մեկ կուսակցության կողմից իշխանության զավթումը:
Այսօր պետական ապարատում դա է տեղի ունենում: Մենք տեսնում ենք, որ ամբողջ իրավապահ համակարգը՝ դատախազությունը, դատարանները պարզապես իշխանության պատվերներն են կատարում: Ըստ էության, խոսելով ժողովրդավարությունից՝ հակաժողովրդական քայլեր են իրականացնում: Մենք վերադարձել ենք միջին ստալինիզմի ժամանակաշրջան, երբ որ սիրուն խոսքերի հետեւում, իսկ որ 1936 թ. սովետական սահմանադրությունը ամենաժողովրդավարներից էր, բայց երկիրը ոչ ժողովրդավարական էր: Հիմա դա Հայաստանի հետ է կատարվում:
Հենց այս Կլոր սեղանը նվիրված է նրան, որպեսզի որոշակի համախմբում տեղի ունենա եւ ժողովրդավար ճանապարհով իշխանափոխություն տեղի ունենա»:
Աշոտ ՀԱԿՈԲՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: