Կառավարության այսօրվա նիստում Արմավիրի մարզպետ է նշանակվել Վահրամ Խաչատրյանը։ «Ինձ համար մեծ պատիվ է մարզպետի պաշտոնում աշխատելը՝ ի նպաստ հայրենի մարզի զարգացման»,- ասել է նա:
Վահրամ Խաչատրյանը ծնվել է 1984 թվականին Արմավիրի մարզի Նորապատ գյուղում։
2015- 2021 թ-ին եղել է Նորապատ համայնքի ղեկավար։
2021 թ. հունիսի 6-ին նշանակվել է Արմավիրի փոխմարզպետ։
2021 թվականի նոյեմբերի 2-ի նշանակվել է մարզի Մեծամոր համայնքի ղեկավարի պաշտոնակատար։
2021 թվականի դեկտեմբերի 5-ին կայացած ՏԻՄ ընտրություններում ընտրվել է Մեծամոր խոշորացված համայնքի ղեկավար։
Արեն Մկրտչյանը նշանակվել է Լոռու մարզպետ։
«Ջանք չեմ խնայի մեր երազանքների Հայաստանի Հանրապետության և մասնավորապես՝ Լոռու մարզի կերտման գործում իմ ներդրումն ունենալու հարցում», կառավարության նիստում ասել է նա։
33-ամյա Արեն Մկրտչյանը ծնվել է Ալավերդիում։ 2012թ. ավարտել է Երեւանի պետական համալսարանի աշխարհագրության եւ երկրաբանության ֆակուլտետի կադաստրային գործ եւ քարտեզագրություն բաժինը:
2011-2016 թվականներին, որպես մարզական լրագրող, աշխատել է «1in.am» լրատվական կայքում և «Ժամանակ» օրաթերթում։
2016-2018 թվականներին եղել է «SOS» հաղորդման սցենարիստ։
2018 թվականի հունիսի 4-ին նշանակվել է վարչապետի օգնական։
2018 թվականի դեկտեմբերի 9-ին կայացած Ազգային ժողովի ընտրություններում պատգամավոր է ընտրվել «Իմ քայլը» դաշինքի համապետական ցուցակով։