Մեդիափորձագետ Նաիրի Հոխիկյանը ֆեյսբուքի իր էջում գրել էր, որ Երեւանի «Հակոբ Կոջոյան» պետական կրթահամալիրի տնօրեն Ռուզաննա Երեմյանի առերեւույթ հակամանկավարժական վարքի եւ «Հանրակրթության մասին» ՀՀ օրենքի 4-րդ հոդվածի խախտման մասին պաշտոնական գրություն է ուղարկել ՀՀ կառավարություն՝ պահանջելով պատասխանատվության ենթարկել տնօրենին։ Նրան պատասխանել էր ԿԳՄՍ փոխնախարար Արաքսիա Սվաջյանը, եւ փոխնախարարի պաշտոնական պատասխանում նշված էր, որ նախարարությունը բողոքի վերաբերյալ գրությունն ուղարկել է Երեւանի քաղաքապետարան;
Aravot.am-ը Երեւանի քաղաքապետարանից փորձեց պարզել, թե ինչ որոշում է կայացվել Ռուզաննա Երեմյանի վերաբերյալ, որն իր ֆեյսբուքյան էջում գրել էր, թե «պատրաստ է» մասնակցել վարչապետի հակաեկեղեցական գործողություններին եւ վեհարանի վրա հարձակմանը:
«Հանրակրթության մասին» ՀՀ օրենքի 4-րդ հոդվածի 8-րդ մասի համաձայն՝ ուսումնական հաստատություններում արգելվում է իրականացնել քաղաքական գործունեություն կամ քարոզչություն: Կրոնական գործունեությունը եւ քարոզչությունը ուսումնական հաստատություններում արգելվում են՝ բացառությամբ օրենքով նախատեսված դեպքերի:
ՀՀ ԿԳՄՍ նախարարի 2023թ փետրվարի 24-ի N10- Ն հրամանով հաստատված՝ Հանրակրթական ուսումնական հաստատությունների կոլեգիալ կառավարման մարմնի՝ խորհրդի անդամների եւ մանկավարժական աշխատողների բարեվարքության կանոնների 3-րդ կետի 6-րդ ենթակետի համաձայն՝ մանկավարժական աշխատողը պարտավոր է հաստատությունում դրսեւորել քաղաքական չեզոքություն, հաստատությունից դուրս իր գործունեության ոլորտի շահառուների (սովորող, ծնող) նկատմամբ դրսեւորել զսպվածություն:
Հարկ է նշել, որ ուսումնասիրության շրջանակում դպրոցում Ռուզան Երեմյանի կողմից նշյալ իրավակարգավորումների խախտումներ չեն արձանագրվել:
Միաժամանակ տեղեկացնում ենք, որ նկատի ունենալով «Հանրակրթության մասին» ՀՀ օրենքի 12-րդ հոդվածի 26-րդ մասով սահմանված՝ ուսումնական հաստատության գործադիր մարմնի քաղաքական զսպվածության դրսեւորման պարտավորվածությանը վերաբերվող դրույթը՝ Ռուզաննա Երեմյանին հորդորվել է զերծ մնալ այնպիսի գործողություններից, որոնք կարող են նշյալ պարտավորությունը չկատարելու մտայնության առիթ ընձեռել»,- Aravot.am-ին գրավոր փոխանցեցին Երեւանի քաղաքապետարանի հանրակրթության վարչությունից:
Գոհար ՀԱԿՈԲՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: