Հակակոռուպցիոն դատարանում Նարինե Ավագյանի նախագահությամբ՝ Ռոբերտ Քոչարյանի եւ մյուսների ապօրինի ծագում ունեցող գույքի բռնագանձման պահանջի վերաբերյալ դատավարության նախորդ նիստում պատասխանող կողմը դատարանին միջնորդել էր, որպեսզի գործի քննությունն ընթանա արագացված ռեժիմով:
Այսօր իր դիրքորոշումը ներկայացրեց դատախազությունը: Փաստարկների մեջ, ի թիվս այլնի, նշեց նաեւ անհրաժեշտության դեպքում հայցի հիմքի առարկայի փոփոխություն բերելու իրենց հնարավորությունից չզրկելը:
«Դա ըստ մեզ ժամանակավրեպ է: Եթե դատախազությունը գտնում է, որ նման ցանկություն ուներ, պետք է արդեն իսկ դրսեւորած լիներ այսօրվա նիստից առաջ, ինչի իրավունքը չի իրացրել: Ու մենք չենք կարող անսահման ժամանակահատվածի վրա սպասել, թե մի օր իրենք կորոշեն հայցադիմումի փոփոխություն բերեն, թե ոչ: Առնվազն ակնհայտ է, որ այս պահի վարույթում գտնվող հայցով չկա որեւէ փաստական հանգամանք, որ սա հանցավորության դեմ պայքարի շրջանակում իրականացվող պրոցես է եւ պատճառահետեւանքային հնարավոր կապ կարող է լինել ենթադրյալ հանցանքի եւ ավելացած ակտիվի միջեւ:
Դատարանն իր հերթին այսօր մերժեց միջնորդությունը՝ հիմքում դնելով այն, որ մի բան եթե ակնհայտ է, այսքան երկար հիմնավորելու անհրաժեշտություն չկա: Դատարանի համար առնվազն այս պահին ակնհայտ չի, որ հայցն ակնհայտ անհիմն է կամ՝ ակնհայտ հիմնավոր: Ըստ էության նաեւ ամրագրեց, որ ինքը զրկված չէ սեփական նախաձեռնությամբ արագացված ռեժիմի անցնելու՝ տեղ թողնելով անհրաժեշտության դեպքում անցում կատարելու: Բայց մի բան ակնհայտ է. մենք այս պահին գործ ունենք ակնհայտ անհիմն հայցի հետ, որի փաստարկները թերի են ու չեն բխում Սահմանադրական դատարանից:
Կարծում եմ՝ դատարանի որոշումը հիմնավորված չէ: Ուղղակի այս պահին բողոքարկելու հնարավորություն չունենք: Բայց կարծում եմ, ընթացիկ իրավիճակով եթե հայցադիմումն ամբողջությամբ չմերժվի, ստիպված կլինենք հետաձգված բողոքարկմամբ այս հարցադրումը բարձրացնել հետագայում»,-Aravot.am-ին ասաց Սեդրակ Քոչարյանի, Զարուհի Բադալյանի, Գայանե Քոչարյանի ու Վիգեն Չատինյանի փաստաբան Հարություն Հարությունյանը:
Հաջորդ դատական նիստը նշանակվել է հունիսի 30–ին, ժամը 16:00-ին:
Աշոտ ՀԱԿՈԲՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: