Արտերկրում ապրող Հայաստանի քաղաքացիներին ընտրելու իրավունքից զրկելու օրենքը հասավ Բարձր դատարանը: Ընտրական օրենսգրքում այս փոփոխությունն արեց իշխող «Քաղաքացիական պայմանագիրը» հունիսի 7-ի խորհրդարանական ընտրություններից հետո:
Օրենքը Սահմանադրական դատարանում վիճարկում է ընդդիմադիր «Հայաստան» դաշինք: Ըստ նախագծի՝ Հայաստանի այն քաղաքացիները, որ ընտրություններին նախորդող երկուսուկես տարում երկրում չեն ապրել, չեն կարող մասնակցել քվեարկությանը: Բացառությամբ արտերկրում սովորող կամ գործուղման մեկնած մարդկանց:
Այս փոփոխությամբ իշխանությունը ընտրելու իրավունքից զրկել է հազարավոր քաղաքացիների: Այդ մարդկանցիցի մեկն է Գեղարքունիքի մարզի բնակիչ Արամ Եսայանը, որ Մոսկվայում է աշխատանքի նպատակով: Նա Հայաստանի քաղաքացիությունից չի հրաժարվել, «Ազատությանն» ասաց՝ միշտ էլ ընտրություններին եկել ու քվեարկել է իր նախընտրած ուժի օգտին:
«Ես Հայաստանի քաղաքացի եմ, ռուսական փաստաթուղթ չունեմ, իմ տունուտեղը, բնակարանը, հողերս, ամեն ինչ Հայաստանում է, ես Մոսկվայում սեփականություն չունեմ: Հայաստանում ապրելով ես չէի կարա իմ աշխատանքով իմ ընտանիքը պահեի ու երեխեքս սովորեին, ես դրա համար եմ Ռուսաստանում», – ասաց նա:
Արամ Եսայանի որդին Մոսկվայում սովորում է ու հիմա ընտանիքով են այնտեղ, բայց այս տարի էլ հատուկ եկել ու մասնակցել է քվերակությանը: Փաշինյանի թիմը մարդկանց զրկում է ընտրելու իրավունքից, բայց այդ նույն մարդկանցից պահանջում են բանակում ծառայել, հարկերը վճարել, ասում է «Ազատության» զրուցակիցը:
Օրենքը «Ազատության» հետ զրույցում հակասահմանադրական էր որակել նաև Սահմանադրության համահեղինակ Վարդան Պողոսյանը: Նրա խոսքով՝ Սահմանադրությունն արդեն սահմանել է՝ ընտրելու իրավունք ովքեր ունեն, ովքեր՝ ոչ: Ու սա այն դրույթն է, որ բացառապես հանրաքվեով կարող ես փոխել: «Հայաստան» դաշինքն էլ հենց այս հարցն է վիճարկում Բարձր դատարանում, «Ազատության» հետ զրույցում մանրամասնեց դիմումը ՍԴ-ում ներկայացնող փաստաբան Տաթևիկ Սողոյանը:
«Ամենաառանցային հարց է պետության ճակատագրի որոշման հարցով, որը միայն մեր պարագայում սահմանված է Սահմանադրությամբ ու այլ ձև չէր կարող ուղղակի քննարկվեր», – նշեց Սողոյանը:
Սահմանադրությամբ՝ Ազգային ժողովի ընտրություններին և հանրաքվեին քվեարկելու իրավունք չունեն միայն դատարանի վճռով անգործունակ ճանաչված, ծանր հանցանքների համար դատապարտված ու պատիժը կրող անձինք: Ըստ մասնագետների՝ Ընտրական օրենսգրքի փոփոխությամբ չեն կարող ընդլայնել այդ սահմանափակումները: Այս նախագծի համահեղինակ Ալխաս Ղազարյանը լրագրողների հետ զրույցում խոստովանել էր, որ վերջին խորհրդրանական ընտրություններից հետո որոշեցին դա փոխել:
«Վերջին ընտրությունների հետ է պայմանավորված նշված փոփոխությունը, և լավ օրից չէ, որ գնում ենք նման փոփոխության, որովհետև պատկերացում չունեինք, որ կարող է նման հարցեր առաջանան», – ասել է ՔՊ-ական պատգամավոր Ալխաս Ղազարյանը:
Իշխանամերձ շրջանակները նախընտրական փուլում բողոքում էին, որ արտերկրից բազմաթիվ մարդիկ են Հայաստան գալիս ընդդիմության օգտին կաշառքով քվեարկելու համար: Ընդդիմադիրների դիմումը բարձր դատարանը քննելու է տարվերջին՝ դեկտեմբերին: