Ներքին գործերի նախարարության ոստիկանության պարեկային ծառայության պետի տեղակալ Արման Չիլինգարյանը հայտնել է, որ վարորդական իրավունքից զրկման ժամկետը պարտադիր պետք է լրանա, որից հետո մեկ տարի անց քաղաքացիները կարող են դիմել և վճարովի հիմունքներով վերականգնել այն։
«Եթե կան այդպիսի մարդիկ, ովքեր պոտենցիալ կրկնելու են այն արարքը, որի համար զրկվել են վարորդական իրավունքից, վստահեցնում եմ, որ իրենց համար 6 տուգանային միավորը 2 օրվա սպառելու հարց է լինելու: Սա հնարավորություն է բոլոր այն մարդկանց, ովքեր պատրաստ են ընդառաջ գնալ պետության կողմից մեկնած ձեռքին, փոխել իրենց վարքագիծը, դրսևորել պատշաճ վարորդի վարքագիծ, հետո ստանալ 13 միավորը:
Բոլոր այն մարդիկ, ովքեր չեն գնա ընդառաջ այս նախաձեռնությանը ու կդրսևորեն հակառակ վարքագիծ, 6 տուգանային միավորը վստահաբար շատ արագ կսպառեն: Սա հնարավորություն է տալ այն մարդկանց, ովքեր իրենց կարծիքով պատահականության կամ եզակի արարքի պատճառով են զրկվել, նրանք 1 անգամ կարող են օգտվել հնարավորությունից ու վերադառնալ պատշաճ վարորդի կյանքին»,- նշել է Չիլինգարյանը:
ՆԳՆ ներկայացուցիչները հավելեցին՝ այս պահին վարորդական իրավունքից զրկված 18,000 անձ կա, ու նրանց ևս մեկ անգամ հնարավորություն է տրված: