ԱՄՆ հատուկ բանագնաց Սթիվ Ուիթքոֆը և ԱՄՆ նախագահ Դոնալդ Թրամփի փեսան՝ Ջարեդ Քուշները, այսօր կմիանան Եգիպտոսում անցկացվող Գազայի խաղաղության ծրագրի շուրջ Իսրայելի և ՀԱՄԱՍ-ի ներկայացուցիչների միջև բանակցություններին։
Գործընթացին ծանոթ պաղեստինցի բարձրաստիճան պաշտոնյան BBC-ին ասել է, որ երեքշաբթի անուղղակի բանակցությունների երկրորդ օրն ավարտվել է առանց շոշափելի արդյունքների։
Հոկտեմբերի 7-ին Թրամփը դրական կարծիք էր հայտնել՝ նշելով, որ «կանենք ամեն ինչ, որպեսզի բոլորը հետևեն համաձայնագրին»։ Նա նաև ասել էր, որ ԱՄՆ-ն ցանկանում է պատանդների անհապաղ ազատ արձակում։
Իսրայելի վարչապետ Բենիամին Նեթանյահուն չի մեկնաբանել բանակցությունների ընթացքը, բայց ասել է, որ դրանք մտել են վճռորոշ փուլ։
Կատարի վարչապետ Շեյխ Մոհամմեդ բին Աբդուլ Ռահման ալ Թանին, որը համարվում է հիմնական միջնորդ, նույնպես կմասնակցի բանակցություններին։ Ակնկալվում է, որ նրան կմիանա նաև թուրքական հետախուզության ղեկավարը։
Բանակցություններին ծանոթ պաղեստինցի բարձրաստիճան պաշտոնյան BBC-ին ասել է, որ բանակցությունները «դժվար են եղել և դեռևս որևէ իրական առաջընթաց չեն ապահովել», բայց նշել է, որ միջնորդներն ամեն ինչ անում են երկու կողմերի դիրքորոշումների միջև եղած տարբերությունը մեղմացնելու համար։
ՀԱՄԱՍ-ի գլխավոր բանակցող Խալիլ ալ-Հայյան, որին Իսրայելը փորձել էր վերացնել Կատարի վրա վերջերս կատարված հարվածի ժամանակ, եգիպտական պետական «Ալ Քահերա Նյուզ» հեռուստաընկերությանը ասել է, որ խումբը պատրաստ է «լուրջ և պատասխանատու բանակցությունների»։
Նա նշել է, որ ՀԱՄԱՍ-ը պատրաստ է համաձայնության գալ, բայց Թրամփի և միջազգային հանրության կողմից անհրաժեշտ են «իրական երաշխիքներ», որ պատերազմը կավարտվի և չի վերսկսվի։
Հասարակական կարծիքի հարցումները ցույց են տալիս, որ իսրայելցիների մոտ 70%-ը ցանկանում է, որ պատանդների ազատ արձակումից հետո պատերազմն ավարտվի։