Քաղաքական վերլուծաբան Հակոբ Բադալյանը գրում է․
««Միասնության թեւեր» շարժման ղեկավար, նախկին ՄԻՊ Արման Թաթոյանը այսօր հայտարարել է, որ Նիկոլ Փաշինյանին հաղթելու համար նախկին երեք նախագահները պետք է դուրս գան քաղաքականությունից: Խոսքը մինչեւ 2018 թվականը պաշտոնավարած նախագահների մասին է:
Կարծում եմ, Արման Թաթոյանը մոլորության մեջ է, եթե անկեղծորեն կարծում է, որ նախկին երեք նախագահների՝ քաղաքական պրոցեսներում չլինելը դառնալու է Նիկոլ Փաշինյանին իշխանությունից հեռացնելու գործուն միջոց:
Ըստ իս, սա նույնիսկ թեմա է, որի վրա փորձ է արվում ընդհանրապես միավորներ հավաքել քաղաքական դաշտում, ոչ ավելի: Եվ սա չի վերաբերում միայն Թաթոյանին, այլ գործնականում բոլոր այն ուժերին, որոնք այս միտքն են առաջ մղում, իբրեւ Փաշինյանի դեմ պայքարում հաջողության գրավական:
Կրկնեմ, սա մոլորություն է, եթե արտահայտվում է որպես անկեղծ պատկերացում: Դե, իսկ եթե դրա ներքո կան արդեն այլ հաշվարկներ, ապա, գործ ունենք իհարկե ուրշ բանի հետ:
Իսկ ինչու՞ է մոլորություն: Եթե երեք նախկին նախագահները ոչ միայն քաղաքականությունից, այլ նույնիսկ հեռանան կյանքից (երկար կյանք նրանց բոլորին), ապա միեւնույն է, նրանց «ստվերը» քարոզչական դաշտում անխնա ծառայեցվելու է ցանկացածին նրանցից որեւէ մեկի հետ կապելու համար:
«Կապելու» պրոցեսը ռացիոնալ չէ շատ վաղուց: Դա իռացիոնալ հանրային ընկալումների վրա կատարվող խաղադրույք ու հաշվարկ է, ու այն աշխատելու է մշտապես:
Հենց այստեղ է առանցքայինը, որ պետք է աշխատել հանրային ընկալումների դաշտում ռացիոնալության տարածությունը մեծացնելու վրա, ինչի հարցում որեւէ նշանակություն չունի՝ երեք նախկին նախագահները քաղաքական դաշտում են, թե՞ ոչ:
Օրինակ, գործնականում բոլոր սոցհարցումները ցույց են տալիս, որ կա հանրության առնվազն 50-60 տոկոս մի հատված, որը չի հարում որեւէ քաղաքական ուժի, չի վստահում գործող ուժերին:
Որեւէ նոր ուժի համար այդտեղ է աշխատանքային հիմնական դաշտը: Եվ այդ դաշտում չունի նշանակություն՝ նախկին նախագահները քաղաքականության մեջ են, թե ոչ: Այդ դաշտին պետք է ներկայացնել քաղաքական նոր առաջարկ, որը կլինի վստահելի եւ քաղաքական գործընթաց կներառի հանրային նոր շերտեր ու խմբեր:
Ի դեպ, ինչպես նկատել եմ մի քանի անգամ, կարծես թե այդ տրամաբանությամբ աշխատանքի մոդելն է ընտրել Սամվել Կարապետյանի ձեւավորած շարժումը: Համենայն դեպս, գոնե մինչ այժմ այդ շարժումը չի հայտարարել, թե նախկին նախագահները պետք է դուրս գան քաղաքականությունից: Այո, ասել են, որ ընտրությանն ընդառաջ չեն գործակցի նրանց հետ, բայց կարծես թե չեն հայտարարել, որ պետք է նրանք դուրս գան քաղաքականությունից:
Սա ռացիոնալ է, սա է ռացիոնալը:
Ի վերջո, նախկին երեք նախագահներն ունեն իրենց համակիրների սեգմենտը, որ ապահովում է ընդդիմադիր քաղաքական տրամադրվածությամբ կայուն շերտեր: Այո, այդ շերտերի հավաքական ծավալը բավարար չէ Նիկոլ Փաշինյանի զբաղեցրած տեսակարար կշռի վճռորոշ նվազեցման համար:
Բայց, այստեղ լուծումն այն չէ, որ չլինեն այդ շերտերը, այլ այն, որ լինեն նորերը՝ եւ ոչ եղածի հաշվին:
Կարծում եմ, սա էական է»։
Հիշեցնենք, որ այսօր «Միասնության թևեր» քաղաքական նախաձեռնության ղեկավար Արման Թաթոյանը հայտարարել է. «Եթե պաշտոնաթող նախագահներն ուզում են Նիկոլ Փաշինյանը չհաղթի, ուրեմն պետք է դուրս գան 2026թ․ ընտրապայքարից»։