Թեհրանը դատապարտել է Իսրայելի ռազմական հարվածները Լիբանանի տարածքին՝ դրանք անվանելով «սիոնիստական ռեժիմի ագրեսիա» և տարածաշրջանային անվտանգությանն ուղղակի սպառնալիք, հայտնում է IRNA-ն՝ հղում անելով Իրանի արտաքին գործերի նախարարությանը։
Իրանի ԱԳՆ-ն շեշտել է, որ հարձակումները խախտում են Լիբանանի ինքնիշխանությունը և «միջազգային խաղաղության դեմ ուղղված հանցագործություն են»։ Արտաքին գործերի նախարարությունը մեղադրել է Իսրայելին «իր էքսպանսիոնիստական քաղաքականությունն ընդլայնելու» և Միացյալ Նահանգներին՝ լարվածության սրման գործում ուղղակի «աջակցության և հանցակցության» մեջ՝ նշելով, որ նման գործողությունները հնարավոր չէին լինի առանց ամերիկյան հովանավորության։
Թեհրանի տվյալներով՝ նոյեմբերին կնքված հրադադարից ի վեր Լիբանանի վրա հարվածների հետևանքով զոհվել և վիրավորվել է ավելի քան 1000 մարդ, ինչպես նաև ոչնչացվել են քաղաքացիական ենթակառուցվածքներ և բնակելի թաղամասեր։ Հայտարարության մեջ ասվում է, որ հարձակումները խոչընդոտում են Լիբանանի վերակառուցմանը և նպատակ ունեն «խաթարել նրա ինքնիշխանությունն ու անվտանգությունը»։
Իրանը նաև կոչ է արել ՄԱԿ-ին, միջազգային հանրությանը և տարածաշրջանային երկրներին ավելի կոշտ դիրքորոշում ընդունել Իսրայելի նկատմամբ, «պատասխանատվության ենթարկել նրան» և կանխել անպատժելիության մշակույթի արմատավորումը։
Թեհրանը ցավակցություն է հայտնել Լիբանանին, աջակցել ժողովրդին և ղեկավարությանը, ինչպես նաև վերահաստատել իր հանձնառությունը՝ օգնելու «օրինական դիմադրությանն» ինքնիշխանության և սահմանների պահպանման համար պայքարում։
Հոկտեմբերին Իսրայելի ռազմաօդային ուժերն ավիահարվածներ էին հասցրել Լիբանանի հարավին։ Լիբանանի իշխանությունները բազմիցս նշել են, որ Իսրայելը շարունակում է համակարգված կերպով խախտել Լիբանանի ինքնիշխանությունը՝ չնայած 2024 թվականի նոյեմբերին կնքված հրադադարի համաձայնագրին։ Իսրայելն ընդգծել է, որ կշարունակի հարվածել Լիբանանին՝ շիական դիմադրության կողմից ներկայացվող սպառնալիքը վերացնելու համար։
Նոյեմբերին Լիբանանի հարավում ապրող բնակիչներն սկսել էին լքել իրենց տները և տեղափոխվել ավելի անվտանգ տարածքներ՝ Իսրայելի կողմից «Հեզբոլլահ»-ի շիաների ենթադրյալ թիրախների վրա ավիահարվածների վերսկսվելուց հետո։
