Քաղաքական մեկնաբան Հակոբ Բադալյանի գրառումը․ «ԱՄՆ նախագահ Դոնալդ Թրամփը բացասական է պատասխանել լրագրողների հարցին, թե մտադի՞ր է արդյոք ռազմական հարված հասցնել Վենեսուելային:
Միջազգային մամուլում վերջին օրերին այդ առնչությամբ լինում են տարբեր հրապարակումներ, ընդհուպ այն, որ Թրամփը ծրագրել է Վենեսուելայի նախագահ Մադուրոյին հեռացնել իշխանությունից ուժային գործողության միջոցով:
Վենեսուելային հարվածելու մտադրության մասին հարցին Թրամփը, սակայն, լրագրողներին պատասխանել է՝ «Ոչ»:
Սա երաշխի՞ք, որ իքս պահի այն չի դառնա «Այո»: Կարծում եմ՝ ոչ, երաշխիք չէ: Երաշխիք չէ ոչ այն պատճառով, որ Թրամփը կարող է փոշմանել: Նրան պարզապես կարող են պարտադրել մտնել Վենեսուելայի հետ ռազմական բախման մեջ: Պարտադրողներն, իհարկե, նրա քաղաքական հակառակորդներն են, կամ այսպես ասած՝ եվրաատլանտյան ուլտրագլոբալիստական թևը: Գամելով Թրամփին վենեսուելական ուղղությամբ, նրանք այլ՝ ավելի կրևոր ուղղություններով կարող են ավելի սահմանափակել նրա հնարավորությունները, միևնույն ժամանակ նաև կոտրել «խաղաղարարի» իմիջը, որ Թրամփը փորձում է «քարից հաց քամելու» տրամաբանությամբ քամել իր համար:
Կրկնեմ, հարցն այստեղ այն չէ, որ ուլտրագլոբալիստները չար են, իսկ Թրամփը՝ բարի, և չի ուզում պատերազմ: Այստեղ քաղաքական պարադիգմի հարց է: Թրամփի նպատակների ծիրում առավել պահանջված միջավայր է կառավարելի, կայուն միջավայրը: Նրա եվրաատլանտյան հակառակորդների համար պատկերը և պարադիգմը հակառակն է, նրանց համար էական է Թրամփին ներքաշել հնարավորինս շատ ռազմական «կաթսաների» մեջ»: