Մարտունակից պաշտպանունակ․վարչապետը՝ բանակի հայեցակարգի փոփոխության մասին

Զինված ուժերի զարգացման ռազմավարության հիմքում լինելու է ոչ թե մարտունակ, այլ պաշտպանունակ բանակի մոդելը՝ Ազգային ժողովում հաջորդ տարվա պետբյուջեի նախագծի քննարկման ժամանակ ասել է վարչապետը։ Նիկոլ Փաշինյանի խոսքով՝ բանակի առաքելությունը սահմանափակվում է երկրի միջազգայնորեն ճանաչված սահմանների պաշտպանությամբ։ Մինչ իշխանությունը վերասահմանում է բանակի գաղափարական հիմքերը, ընդդիմությունը մտահոգության առարկա է համարում  պաշտպանական բյուջեի կրճատումը։ Կառավարությունը վստահեցնում է՝ ծախսերի նվազումը չի վտանգում բարեփոխումների ընթացքն ու Զինված ուժերի պաշտպանունակությունը։

Հայաստանը շարունակում է քայլեր անել բանակն ուժեղացնելու և Զինված ուժերի հայեցակարգը զարգացնելու ուղղությամբ՝ ԱԺ հանձնաժողովների համատեղ նիստում 2026–ի պետբյուջեի նախագծի քննարկմանն ասել է վարչապետ Նիկոլ Փաշինյանը։

«Մենք զարգացնում ենք այն գաղափարական հիմքերը, որոնց վրա պետք է կառուցվի մեր բանակը։ Հայաստանի Հանրապետության բանակը խնդիր չունի լուծելու ՀՀ-ի միջազգայնորեն ճանաչված, ինքնիշխան տարածքից դուրս։ Մենք կարևորում ենք, որ մեր խոսքում «մարտունակ բանակ» արտահայտությունը փոխարինենք «պաշտպանունակ բանակ» հասկացությամբ»։

Վարչապետի խոսքով՝ այս ձևակերպումը կարևոր է, քանի որ ընդգծում է բանակի հիմնական առաքելությունը։ Հայաստանի զինված ուժերը պետք է պաշտպանունակ լինեն, կարողանան պաշտպանել Հայաստանի Հանրապետության տարածքային ամբողջականությունն ու ինքնիշխանությունը, ինչպես նաև քաղաքացիներին։

Այս համատեքստում խորհրդարանական ընդդիմությունն իշխանություններին հարց է ուղղում՝  ինչպես կարելի է մարտունակ բանակ ստեղծել պաշտպանության ոլորտի ծախսերի կրճատմամբ։ Հաջորդ տարվա բյուջեի նախագծով՝ կառավարությունը մտադիր է ավելի քան 15 %-ով կրճատելու ռազմական բյուջեն։ Պաշտպանության նախարար Սուրեն Պապիկյանը Հանրային հեռուստաընկերությանը տված հարցազրույցում ասել է, որ բանակի բարեփոխումների վրա ֆինանսավորման կրճատումը չի ազդի։  Նախագծով՝ պաշտպանության նախարարությանը 2026-ին կհատկացվի 563 միլիարդ դրամ կամ մոտ 1,5 մլրդ դոլար։ 2025-ի համեմատ՝ ռազմական ծախսերը կկրճատվեն մոտ 265 մլն դոլարով։

«Մեզ մեղադրում են բյուջեն կրճատելով բանակը քանդելու համար, սակայն 2025–ի ծախսերը վերաբերում են հենց բանակի արդիականացմանը և չեն կարող խոչընդոտել բարեփոխումների ընթացքը։ 2024–ին պաշտպանության բյուջեն կազմել է 556 մլրդ դրամ, իսկ 2026–ին նախատեսվում է 567 մլրդ դրամ,ինչը տարբերությամբ մոտ 11 մլրդ դրամ է։ Եթե շարունակվեր բնականոն աճը, երկու տարվա տարբերությունը կարող էր լինել մոտ 5–ական մլրդ դրամ, և որևէ հարց չէր առաջանա։ Սակայն քանի որ մենք 2025-ին կատարել ենք ավելի մեծ ծախս, քան նախատեսված էր, առաջացել է այս անհամաչափությունը»։