Սերբիայի արտաքին գործերի նախարար Մարկո Ջուրիչը Բելգրադն առաջարկել է որպես Ուկրաինայի հակամարտության կարգավորման բանակցությունների վայր։
«Սերբիան նույնպես այն երկրների շարքում է, որոնք պատրաստ են առաջարկել իրենց ծառայությունները, հաշվի առնելով մեր պատմությունը և բոլոր կողմերի հետ մեր բարեկամական հարաբերությունները, որպեսզի անհրաժեշտության դեպքում և եթե կա հետաքրքրություն, փորձեն բանակցություններ վարել այս սարսափելի ողբերգությունը դադարեցնելու վերաբերյալ», – ասել է նա շաբաթ օրը Fox News-ին տված հարցազրույցում։
Սերբիայի արտաքին գործերի նախարարն ընդգծել է, որ Ուկրաինայում հակամարտությունը պետք է անհապաղ ավարտվի։
Ավելի վաղ ԱՄՆ նախագահ Դոնալդ Թրամփը հայտարարել էր, որ Բուդապեշտում Ռուսաստանի առաջնորդ Վլադիմիր Պուտինի հետ նախատեսված հանդիպումը չեղարկվել է, բայց կարող է տեղի ունենալ «ապագայում»։ ԱՄՆ պետքարտուղար Մարկո Ռուբիոն այնուհետև հայտարարել էր, որ Վաշինգտոնի վարչակազմը պատրաստ է հանդիպել ռուս պաշտոնյաների հետ, եթե նման շփումները կնպաստեն Ուկրաինայի հակամարտության կարգավորմանը։