Փորձում են կոտրել Արագածոտնի թեմի առաջնորդարանի չհրկիզվող պահարանի դուռը

ՆԳՆ փրկարար ծառայության աշխատակիցները Արագածոտնի թեմի առաջնորդարանի բակում փորձեցին կոտրել չհրկիզվող պահարանի դուռը:

«Պետք չի ներխուժել»,- լսվեց ինչ-որ մեկի հորդորը իրավապահներին, սակայն, տեսանյութում երեւաց, թե ինչպես են նրանք շարունակում գործել:

Ոստիկանությունից լրագրողներին հավաստիացրեցին, որ փրկարարներն աջակցում են քննչական գործողություններին:

ԱԱԾ աշխատակիցները չթույլատրեցին Երեւանի ավագանու անդամ Սոնա Աղեկյանին մտնել Արագածոտնի առաջնորդարան` պատճառաբանելով, թե գործողություններ են կատարում: Ի պատասխան նրանց՝ ավագանու անդամը պնդեց. «Ես խնդրում եմ հարգել իմ հավատքը և չխոչընդոտել»:

Նա կոչ արեց չենթարկվել ապօրինի հրամանների:

Քննչական գործողությունները թեմում սկսվել էին առավոտյան 7-ի սահմաններում: Արագածոտնի թեմի մի քանի հոգեւորականի եւ թեմի առաջնորդ Մկրտիչ Սրբազանին բերման են ենթարկել՝ նրանց բնակարանները խուզարկելուց հետո:

Գոհար ՀԱԿՈԲՅԱՆ