ԵՐԵՎԱՆ, 25 սեպտեմբերի․/ԱՌԿԱ/․ ՀՀ կառավարությունը հինգշաբթի նիստի ժամանակ հատկացրել է 3 մլրդ 219 մլն դրամ կենսաթոշակառուների և նպաստառուների հետվճարի տրամադրման ծրագրի շարունակականության միջոցառումների շրջանակում։
Ինչպես տեղեկացրեց աշխատանքի և սոցիալական հարցերի նախարար Արսեն Թորոսյանը, նշված գումարը կուղղվի 2025թ․–ի հոկտեմբեր–դեկտեմբերի հետվճարի վճարմանը։
Թորոսյանը հայտարարել է, որ հետվճար տրամադրելու համար 2025 թվականի պետական բյուջեով նախատեսվել է ի սկզբանե 12 մլրդ 432 մլն դրամ:
«Հետո ճշտվել է 13 մլրդ 152 մլն դրամ, սակայն միտումները հաշվի առնելով, այսօրվա որոշումն էլ ավելացնելով, տարեկան ընդհանուր կանխատեսումը մոտավորապես կլինի 16 մլրդ 371 մլն դրամ: Շահառուների թիվը նույնպես կանխատեսվածից ավելին է: Արդեն ունենք մոտ 350 հազար շահառու, որոնք օգտվում են այս ծրագրից, և ունենք ամսական մոտավորապես 2-3 տոկոս աճ»,- ասել է նախարար:
Թորոսյանը նաև նշել է, որ այս պահի կարգավորումների համաձայն՝ հետվճարով վերադարձվում է գործարքների 12 տոկոսի չափով, բայց ոչ ավելի, քան 6000 դրամը և հետվճարը վճարվում է յուրաքանչյուր ամիս մինչև տվյալ ամսվա 25-ը:
Կենսաթոշակառուների և նպաստառուների համար հետվճարի ծրագիրը գործում է 2022թ․–ի հուլիսի 1–ից։
Սկզբում նրանք ստանում էին 10 տոկոս հետվճար (բայց ոչ ավելի, քան 5000 դրամը), ավելի ուշ հետվճարը կազմեց 12% (բայց ոչ ավելի, քան 6000 դրամը)
Հունվարի 9–ին կառավարությունը երկարաձգեց ծրագիրը մինչև 2025թ․–ի վերջ։ ($1 — 382.72 դրամ)