Միացեալ Նահանգներու յատուկ պատուիրակին յայտարարութիւնը առ այն, որ այնքան ատեն որ Հըզպալլան զէնքը կը պահէ, խօսքերը բաւարար չեն հարցերու լուծման եւ թէ կառավարութիւնն ու Հըզպալլան լիարժէք կերպով յանձնառու պէտք է ըլլան եւ անմիջապէս քայլեր կատարեն, որպէսզի լիբանանցի ժողովուրդը սառեցուած եւ անելանելի կացութեան չդատապարտուի, միեւնոյն դիրքորոշումին տարբեր ձեւակերպումն է: Այլ խօսքով, յայտարարութիւններուն եւ խոստումներուն կամ նոնյիսկ յանձնառութիւններուն դիմաց չեն կատարուիր երկիրը ներկայ վիճակէն դուրս բերելու կոչուած օժանդակութիւնները:
Զէնքի յանձնումը կամ զէնքի մենաշնորհումը պայման է որեւէ քայլի նախաձեռնելէ առաջ: Այս չի նշանակեր, որ անոր ենթահողի պատրաստութեան ուղղութեամբ աշխատանքները դադրած են: Թէ՛ պետական եւ թէ՛ հասարակական մակարդակներու վրայ ներլիբանանեան ճնշումը կը սաստկանայ զէնքի մենաշնորհումը իրականացնելու համար:
Սուրիոյ մէջ արձանագրուող դէպքերը սակայն գէթ հասարակական մակարդակի վրայ հարցականի տակ կրնան առնել զէնքի յանձնումի նպատակայարմարութիւնը: Ահաբեկչական տիպի եւ անզէն բնակչութեան դէմ վայրագութիւններ իրականացնողները շատ հեռու չեն լիբանանեան տարածքներէն: Դէպքերու բնոյթն ու տարողութիւնը մտածել կու տան այս մասին:
Լիբանանեան լրատուամիջոցներու հաղորդած լուրերը որոշակիօրէն կը կապուին այս հարցին: Սէուտական Արաբիոյ պաշտպանութեան նախարար Խալետ Պըն Սալմանի հովանաւորութեամբ եւ արտաքին գործոց նախարարի խորհրդական Եազիտ Պըն Ֆարհանի օգնականութեամբ, Ռիատի մէջ գումարուած է Լիբանան-Սուրիա ապահովական ժողով մը` լիբանանեան հետախուզութեան տնօրէն Թոնի Քահուաժիի եւ անոր սուրիացի պաշտօնակից Հիւսէյն Սալամէի միջեւ: Լիբանան-Սուրիա համակարգումը պիտի շարունակուի սէուտական հովանաւորութեամբ, ինչ որ ցոյց կու տայ, թէ Ծոցի շրջանը Լիբանանի յաւելեալ քաոսի մատնուիլը կանխարգիլելով հետաքրքրուած է:
Սէուտական Արաբիա-Թուրքիա մրցակցութիւնը Սուրիոյ հովանաւորչութեան ուղղութեամբ երկու բաղադրիչ ունէր: Ռիատը կը փորձէր տնտեսական մարզին մէջ գերակայութիւն հաստատել, ներդրումներու ծրագիրներով առկայութիւն ապահովել, մինչ Անգարան կը շարունակէր զինուորական-ապահովական ոլորտին մէջ անփոխարինելի դեր ստանձնել: Վերը նշուածները կը խօսին երկու ուղղութիւններուն վրայ Ռիատի բացած հովանոցին մասին:
Վերադառնանք զէնքի մենաշնորհումի պահանջին: Խնդիրը սերտօրէն կապուած է նաեւ սուրիական իրադարձութիւններուն հետ: Դիմադրութեան առանցքը Լիբանան-Սուրիա գիծին վրայ ջլատուած է: Սուրիոյ մէջ գործող ահաբեկչական տարրը սպառնալիք է նաեւ Լիբանանի անվտանգութեան: Անոր զսպիչ գրաւականը միայն լիբանանեան բանակը կրնայ չըլլալ: Հզօրացուած բանակը` թերեւս:
Այդ վտանգի չէզոքացման, կանխարգիլման կամ ընդհանրապէս վերացման ուղղութեամբ է, որ Սէուտական Արաբիան կ՛աշխատի: Եւ պատահական չէ, որ կը համակարգէ Սուրիա-Լիբանան զինուորական-ապահովական միջգերատեսչական աշխատանքները:
Այս վտանգներու կանխարգիլման երաշխիքները տակաւին չկան: Աշխատանքներ կ՛երեւին: Առանց այդ բոլորի յստակացման զէնք պահանջելը ապահովութիւն հաստատելու առաջադրանքներէն չի մեկնիր:
«Ա.»