Նախկին պատգամավոր Նաիրա Զոհրաբյանը «Հայելի» ակումբում անդրադարձավ այսօր տարածված այն լուրին, թե Ջերմուկի հատվածում ադրբեջանական կողմը հայկական նոր դիրք է գրավել: Հիշեցնենք, որ ՀՀ ՊՆ մամուլի քարտուղարը հերքել է այդ լուրը՝ նշելով. «Մամուլում և սոցցանցերում շրջանառվող այն տեղեկությունները, թե իբր «Ջերմուկի ուղղությամբ բանակային դիրք է գրավվել», չեն համապատասխանում իրականությանը: Հորդորում ենք զերծ մնալ կեղծիք և ապատեղեկատվություն տարածելուց, հատկապես որ պաշտպանության նախարարությունը լրագրողական առաջին իսկ հարցմանն ի պատասխան հերքել է այդ տեղեկությունը»:
Նաիրա Զոհրաբյանն ասաց. «Այդ տեղեկատվությունը ես էլ տեսա: Ճշտելու համար խոսել եմ մի քանի ջերմուկցիների հետ, որոնք, ըստ էության, հաստատում են Yerkir.am-ի տեղեկատվությունը, որ չվերահսկվող մի դիրք, շատ կարեւոր դիրք, որը շատ մոտ է Ջերմուկին, անցել է ադրբեջանական վերահսկողության տակ:
Հիմա տրամաբանական հարց: Նիկոլը անընդհատ ինչ-որ բան է ուզում «ազատագրել»: Հիմա էլ ուզում է եկեղեցին «ազատագրի»: Եկեղեցին 1700 տարի ազատագրված է, Նիկոլ: Եթե քո մեջ ազատագրելու ինչ-որ մղում կա, գնա Ջերմուկի դիրքերը ազատագրի, Իշխանասարի դիրքերը ազատագրի, Սեւ Լճի դիրքերը ազատագրի, Խնձորեսկի, Սիսիանի, Կապանի օդանավակայանից այն կողմի դիրքերը ազատագրի: Ազատագրի բոլոր այն դիրքերը, որոնք 2021 թվականի մայիսի 12-ից ներառյալ պարբերաբար զավթվել եւ զավթվում են ադրբեջանական նախիրի կողմից: Ոչ թե Ջերմուկի օկուպացված դիրքերում որեւէ գործողություն չանեք եւ ձեր գենշտաբի պետը հայտարարի, որ ոչ մի բան չենք անում, սպասում ենք, որ իրենք սովածանան կամ լողանալ ուզենան, իրենք-իրենց հետ քաշվեն: Հետ քաշվեցի՞ն: Իհարկե, ոչ: Այնտեղ ինժեներական հսկայական դիրքավորումներ են արել:
Ես եւս ուզում եմ անդրադառնալ հարցին, որ պատերազմից հետո Ջերմուկ քաղաքի բնակչության գերակշիռ մեծամասնությունը «դուխով» էր, «հպարտ» էր: Անգամ զոհվածի մայրը «հպարտ» էր եւ ասում էր. «Նիկոլը լավա արել, որ տարել է բայրաքթարների տակ իմ երեխուն սպանել է»: Ավելին, հիշո՞ւմ եք, որ այնտեղ՝ Ջերմուկում, մեր զինվորականները տեւական ժանամակ չէին կարողանում մոտենալ, որպեսզի դիրքերի արանքում ընկած դիակները հանեին: Ծնողը հեռադիտակով ամեն օր տեսնում էր վայրի գազանների կողմից հոշոտվող իր որդու դիակը, բայց մեր ուժերը չէին կարողանում տեւական ժամանակ մոտենալ, մեր այդ դիակները բերելու համար:
Միջազգային բոլոր կառույցներում ես մեծ սլայդներով ցուցադրում եմ ոչ թե գազանների, այլ ադրբեջանցիների կողմից հայ կին ազատամարտիկների հոշոտված, անարգված, մասնատված, պղծված դիակները: Եվ այդ ամենը տեսնելուց հետո, Նիկոլ, ինչ որ բա՞ն ես ուզում ազատագրել: ՕԿ, գնա, ազատագրի բոլոր այն դիրքերը, որոնք պատերազմից հետո զավթվել են ադրբեջանական զինուժի կողմից: Եվ հարցին. «Չէք պատրաստվո՞ւմ դուրս գալ Ջերմուկի դիրքերից, Ալիեւը պատասխանել է. «Ոչ: մեր զինվորը կանգնած է այնտեղ, որտեղ պետք է լինի կանգնած»:
Ու դրա անունը խաղաղություն է ըստ Նիկոլի, խաղաղություն է ըստ Ալիեւի»,- ասաց Նաիրա Զոհրաբյանը:
Աշոտ ՀԱԿՈԲՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: