Համացանցում տեղեկություն էր տարածվել, որ Իսրայելում երկու անցորդ անհարգալից վերաբերմունք են ցուցաբերել Հայոց եկեղեցու հանդեպ՝ թքելով Երուսաղեմի Հայոց վանքի մուտքի մոտ:
Aravot.am-ը թեմայի վերաբերյալ մեկնաբանություն է խնդրել տեղի հայկական համայնքի ներկայացուցիչ Բեդիկ Գիրագոսյանից:
Նա հաստատեց, որ նման միջադեպ իսկապես տեղի է ունեցել Հայոց վանքի մուտքի մոտ, հետո հավաքվել են նաեւ այլ հրեաներ: Իրեն զանգահարել են մեր այլ հայրենակիցներ, իսկ Բեդիկ Գիրագոսյանը արդեն տեւական ժամանակ հսկում է Կովերի պարտեզը, որից հետո արագ հասել են դեպքի վայր:
«Կովերի պարտեզը մոտ է, զանգեցին, վազելով գնացինք, զանգեցինք ոստիկանություն, սակայն ոստիկանությունը 15-20 րոպե ուշացումով եկավ, սակայն ոչ մի բան չձեռնարկեց: Նման դեպքերը վերջին շրջանում շատ-շատ են պատահում, սրանք ծայրահեղության նշաններ էին, որ առաջ էլ կային, բայց հիմա ավելի են շատացել»,-մեզ փոխանցեց իսրայելաբնակ մեր հայրենակիցը:
Նրանից հետաքրքրվեցինք՝ ինչո՞վ է պայմանավորված նման դեպքերի թվի աճը: Բեդիկ Գիրագոսյանն ասաց, որ ավելի շատ մարդ է անցնում Երուսաղեմի Հայկական թաղամասով, նաեւ հիմա հրեական տոներն են, նաեւ դրանով է պայմանավորված:
Մեր զրուցակիցը նշեց, որ նման միջադեպեր լինում են հատկապես այն ժամանակ, երբ հրեաները մեծ խմբերով են լինում. «Երբ 50-100 հոգով են լինում, այդ ժամանակ ավելի են ոգեւորվում, մարդաքանակով պայմանավորված՝ ավելի ագրեսիվ են դառնում: Մենք միշտ ոստիկանություն ենք զանգում, բայց երբեք արագ տեղ չի հասնում»:
Մեր զրուցակիցն ընդգծեց, որ նման վերաբերմունքը բոլոր քրիստոնյաների հանդեպ է, բայց ատելության մեծ բաժինն ուղղված է Հայոց եկեղեցու ու հայերի դեմ. «Մնացած վանքերը հեռու են, բայց մենք ճիշտ իրենց ճանապարհի վրա ենք եւ իրենք Հայոց թաղով են անցուդարձ անում՝ եւ քայլելով, եւ մեքենայով: Ուրիշ ճանապարհ չունեն, միայն Հայոց թաղով պետք է անցնեն, այսինքն` իրենք մեզ ավելի շատ են հանդիպում: Իրենք էլ լավ գիտեն, որ մենք այստեղից որեւէ տեղ չենք գնալու, ինչքան էլ նեղեն, մենք դիմադրելու ենք, իրենք չեն կարող մեզ վախեցնել»:
Գոհար ՀԱԿՈԲՅԱՆ
Լուսանկարները Բեդիկ ԿԻրակոսյանի ֆեյսբուքյան էջից եւ Վիքիպեդիայից
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: