ՀՀ արտակարգ դեսպանորդ եւ լիազոր նախարար, քաղաքական գործիչ Էդգար Ղազարյանը «Հայելի» ակումբում խոսելով Հայրենական մեծ պատերազմում տարած հաղթանակի կապակցությամբ Նիկոլ Փաշինյանի՝ Մոսկվայում գտնվելու մասին՝ ասաց. «Մինչեւ մայիսի 9-ին նրա՝ Մոսկվա գնալը ասեմ, որ մեր պաշտոնական տոնացույցում նախ կա օրենքով սահմանված պետական տոն՝ մայիսի 8: Դա կաչվում է Երկրապահի օր: Ու Հայաստանի ոչ մի պաշտոնյա ուղերձ չի հղել երկրապահի օրվա առիթով: Նույնիսկ պաշտպանության նախարարը:
Երկրապահի օրն ինչի՞ է մտել մեր Տոնացույց: Շուշիի ազատագրման օրվա խորհրդով: Այսինքն, մենք իրար հաջորդող երկու տոն ունեինք: Պետական բյուջեով անցած կառավարության նիստին չզեկուցվող հարցի միջոցով պետբյուջեից 234 մլն. դրամ փող են տվել երկրապահին: Ինչի համա՞ր: Սասուն Միքայելյանին սարքել են Պրիգոժին, որը մի մասնավոր բանակ է սարքել «Երկրապահը»: Պարզ է չէ՞, որ այդ տարիքի մարդիկ չեն կարող մարտական հերթապահություն իրականացնել: Ընդ որում, թիվը, որ իբրեւ տարել են մարտական հերթապահության, 1800-ից հասցրել են մինչեւ 10 հազար: Այդքան մարդու, եթե հաշվես չորս հոգանոց ընտանիքով, ստացվում է 40 հազար՝ օդից ընկնող 40 հազար մարդ, եթե հիմա ընտրություն լինի: «Երկրապահում» հիմա ովքե՞ր են: Առաջին պատերազմի ժամանակ կռված մասնակիցները: Եվ որպեսզի խնդիրներ չառաջանան, որ իրենց ու իրենց զոհված ընկերների ազատագրած հողերը հանձնվել են թշնամուն, եւ ընտրության համար ձայն ապահովելու նպատակով ամիսը 160 հազար դրամ փող են տալիս: Բայց 234 մլն. դրամ տալուց հետո էլ երկրապահին չեն շնորհավորում»:
Էդգար Ղազարյանը նկատել է, որ Անվտանգության խորհրդի քարտուղար Արմեն Գրիգորյանը Հաղթանակի զբոսայգում հայտարարել է, թե սա Եռատոն չի, այլ երկրորդ համաշխարհային պատերազմում զոհվածների հիշատակի օր է: «Այսինքն, տոն էլ չի, հաղթանակի օր էլ չի, հիշատակի օր է: Սրանց բոլոր ուղերձներում նշվում է Երկրորդ համաշխարհային պատերազմ, ինչը տգիտություն է:
Երկրորդ համաշխարհային պատերազմը 1941-1945 թվականների պատերազմը չէ: Այն սկսվել է 1939 թվականին եւ ավարտվել է 1946 թվականին: Հայրենական մեծ պատերազմը, որի հաղթանակը մենք տոնում ենք մայիսի 9-ին, 1941-1945 թվականի պատերազմն է: Ու սրանք ամեն մի քննարկմանը ամեն ինչ խեղաթյուրում են: Սրանց մեկնաբանությամբ՝ Գերմանիան ֆաշիստական չի, դա միֆ է՝ նացիստական է, սոցիալ-դեմոկրատական է: Ու պարզվում է, որ այդ ամբողջ պատերազմը, որ Հիտլերը զորք է հավաքել, զինել է, մի նպատակ է ունեցել. որ ստեղծվի միասնական Հայաստան: Որովհետեւ Ստալինգրադի ճակատամարտում գերմանացիները պիտի Սովետական Միությանը հաղթեին, հետ գային Կովկաս: Այդ ընթացքում Սովետական Հայաստանը, որը 20 տարի Սովետական Միությունում էր, միանգամից դառնում էր անկախ Հայաստան: Հետո անկախ Հայաստանից, Բուլղարիայից ֆաշիստական Գերմանիան հարձակվելու էր իր դաշնակից Թուրքիայի վրա՝ նպատակով, որ ստեղծեր անկախ Հայաստանը: Բայց այդ Սովետական Միությունը, այդ թվում՝ այդ անխելք հայերը, գնացել ու դիմադրություն են ցույց տվել: Դրա համար էլ այս օրին ենք»,-հեգնեց քաղաքական գործիչը:
Աշոտ ՀԱԿՈԲՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: