Աշխատանքի և բարեկեցության նախարարության նախագծով նախատեսվում է, որ աշխատանքի էական պայմանները՝ աշխատանքի վայրը, աշխատաժամանակի ռեժիմը, պաշտոնը, աշխատանքային գործառույթները և այլն, կարող են փոխվել աշխատողի և գործատուի փոխադարձ գրավոր համաձայնությամբ՝ առանց օրենսգրքով սահմանված 14-ից 60 օր ծանուցման ժամկետների։ Միաժամանակ այդ պարզեցված կարգը չի տարածվի աշխատավարձի նվազեցման և անորոշ ժամկետով պայմանագիրը որոշակի ժամկետով պայմանագրով փոխարինելու դեպքերի վրա. դրանց համար կգործի ընդհանուր կարգը՝ հիմքերի առկայությամբ և ծանուցման ժամկետների պահպանմամբ։
Ինչպես տեղեկացնում է Iravaban.net-ը, նախագծով փոփոխություններ են նախատեսվում Աշխատանքային օրենսգրքի 105-րդ հոդվածում, և օրենսգիրքը լրացվում է նոր 105.1-ին հոդվածով։ Նախագիծը հանրային քննարկման է դրված 2026 թվականի նոյեմբերի 9-ից մինչև 25-ը և դեռ ընդունված չէ։
Ինչպե՞ս է հիմա
Գործող կարգով աշխատանքի էական պայմանները կարող են փոխվել աշխատանքի ծավալների, տնտեսական, տեխնոլոգիական կամ աշխատանքի կազմակերպման պայմանների փոփոխման դեպքում։ Այդ դեպքում գործատուն պետք է աշխատողին գրավոր ծանուցի՝ կախված տվյալ գործատուի մոտ աշխատելու ժամանակից.
- մինչև մեկ տարի աշխատողին՝ ոչ ուշ, քան 14 օր առաջ,
- մեկից մինչև հինգ տարի աշխատողին՝ 35 օր առաջ,
- հինգից մինչև տասը տարի աշխատողին՝ 42 օր առաջ,
- տասից մինչև տասնհինգ տարի աշխատողին՝ 49 օր առաջ,
- տասնհինգ տարուց ավելի աշխատողին՝ 60 օր առաջ։
Եթե աշխատանքի նախկին էական պայմանները չեն կարող պահպանվել, իսկ աշխատողը գրավոր համաձայնություն չի տվել նոր պայմաններով աշխատանքը շարունակելու համար, աշխատանքային պայմանագիրը լուծվում է։
Ի՞նչ է նախատեսում նախագիծը
- Կողմերի փոխադարձ գրավոր համաձայնությամբ էական պայմանները փոխելու դեպքում չեն պահանջվի ո՛չ փոփոխության հիմքերը, ո՛չ ծանուցման ժամկետների պահպանումը։
- Համաձայնությամբ պարզեցված կարգը չի կիրառվի անորոշ ժամկետով աշխատանքային պայմանագիրը որոշակի ժամկետով պայմանագրով փոխարինելու և աշխատավարձի չափը նվազեցնելու դեպքերում, բացառությամբ օրենսգրքի 187-րդ հոդվածով սահմանված՝ փաստացի աշխատած ժամանակին կամ կատարված փաստացի աշխատանքին համապատասխան վարձատրության դեպքերի։
- Էական պայմանների ցանկում «պաշտոնների անվանումները» բառերը կփոխարինվեն «պաշտոնը» բառով, իսկ գործատուի փոփոխման դեպքում 115-րդ հոդվածով սահմանված ժամկետներում ծանուցելու պահանջը կհանվի։
Իսկ աշխատավարձը՝ առանց ձեր համաձայնության
Գործող կարգով առանց աշխատողի գրավոր համաձայնության աշխատավարձի չափը կամ այն որոշելու ձևը գործատուն կարող է փոխել միայն օրենքով կամ կոլեկտիվ պայմանագրով վարձատրության պայմանները փոխվելու դեպքում և պետք է աշխատողին գրավոր ծանուցի ոչ ուշ, քան մեկ ամիս առաջ։ Նախագծով այդ հիմքերին ավելանում է կառավարության որոշումը, իսկ մեկամսյա ծանուցման պահանջը հանվում է։ Նախագծում ուղղակիորեն նշված չէ՝ արդյոք այս դեպքում կգործեն 105-րդ հոդվածի 2-րդ մասով և 115-րդ հոդվածով սահմանված ընդհանուր ծանուցման ժամկետները (14–60 օր)։
Ամփոփում
Ամփոփելով՝ նախագծի ընդունման դեպքում աշխատանքային պայմանները կողմերի գրավոր համաձայնությամբ կարող են փոխվել առանց 14–60 օր ծանուցման, բայց աշխատավարձի նվազեցման և անորոշ ժամկետով պայմանագիրը որոշակի ժամկետով փոխարինելու դեպքում այդ պարզեցված կարգը չի կիրառվի, – տեղեկացնում է Iravaban.net-ը։
Թե ինչ այլ փոփոխություններ են նախատեսվում Աշխատանքային օրենսգրքում, կարդացեք այս նյութում։
Ծանուցում. սույն նյութը պատրաստված է միայն իրավական իրազեկման նպատակով և չի հանդիսանում իրավաբանական խորհրդատվություն։