Այսօր ՏԻՄ ընտրություններ են անցկացվում Լոռու մարզի Թումանյան և Լերմոնտովո, Արմավիրի մարզի Ֆերիկ ու Կոտայքի մարզի Արզնի համայնքներում, հայտնում է Կենտրոնական ընտրական հանձնաժողովը։
Թումանյանում ընտրությունն անցնում է առանց ընդդիմության․ առաջադրված միակ քաղաքական ուժը իշխող «Քաղաքացիական պայմանագիրն» է։ ՔՊ-ի ցուցակը գլխավորում է համայնքի գործող ղեկավար Սուրեն Թումանյանը։
Հինգ տարի առաջ Թումանյանը համայնքի ղեկավար էր ընտրվել իշխանամետ «Հանրապետություն» կուսակցության ցուցակով՝ հաղթելով ՔՊ-ի թեկնածուին։ Այս անգամ նա արդեն իշխող կուսակցության ցուցակով է մասնակցում ընտրություններին՝ առանց մրցակցի։
Թեև խորհրդարանական ընդդիմադիր ուժերը ավելի վաղ հայտարարել էին, որ պատրաստվում են ակտիվ մասնակցել աշնան ՏԻՄ ընտրություններին, Թումանյանում թեկնածու չեն առաջադրել։