Իսրայէլեան բանակը պնդեց, թէ Հըզպալլան չորեքշաբթիէն հինգշաբթի լուսցող գիշեր ականուած երկու անօդաչու թռչող սարքերով թիրախաւորած է հարաւային Լիբանանի Ալի Թահեր բլուրի շրջանին մէջ գտնուող իր ուժերը, որոնց շարքերուն մէջ վնասներ չեն արձանագրուած:
Իսրայէլեան բանակը ըսաւ, թէ իր ուժերը յաջողած են երկու անօդաչու թռչող սարքերէն մէկը վնասազերծել, իսկ միւսը կորսուած է` աւելցնելով, որ «ներկայիս իսրայէլեան բանակը ուժգին կերպով կը գործէ եւ պիտի շարունակէ գործել հարաւային Լիբանանի մէջ իր ուժերը թիրախաւորելու Հըզպալլայի փորձերուն դէմ»:
Ըստ իսրայէլեան բանակին, անցեալ ամսուան ընթացքին Ալի Թահեր բլուրի շրջանին մէջ իր ուժերուն ուղղութեամբ հինգ քամիքազ անօդաչու թռչող սարքեր արձակուած են:
Իսրայէլեան բանակի ձայնասփիւռի կայանը երէկ կէսօրին հաղորդեց, որ իսրայէլեան օդուժը սկսած է հարաւային Լիբանանի մէջ օդային յարձակումներ կատարել` հակադարձելով «Հըզպալլայի խախտումներուն»:
Հարաւային Լիբանանի Նապաթիէ գաւառի Արապսալիմ գիւղին վրայ իսրայէլեան յարձակումներու պատճառով արձանագրուեցան զոհ մը եւ 6 վիրաւորներ:
Իսրայէլեան անօդաչու թռչող սարք մըն ալ յարձակում գործեց Նապաթիէի մէջ ճարտարարուեստական քաղաքի մերձակայքը, իսկ մէկ այլ անօդաչու թռչող սարք մը Տաուհաթ Քֆարրմանի մէջ երկու ձայնային ռումբեր նետեց:
Իսրայէլեան անօդաչու թռչող սարք մը յարձակում գործեց Նապաթիէ Ֆաուքա գիւղին վրայ, իսկ իսրայէլեան հրետանին ռմբակոծեց Մանսուրի եւ Խիամ գիւղերը, ինչպէս նաեւ Ռաշաֆ գիւղի մերձակայքը:
Իսրայէլեան հրետանին ռմբակոծեց Ռաշաֆի մերձակայքը եւ Հարիսի ու Հատտասայի միջեւ գտնուող շրջանը:
Իսրայէլեան բանակը պնդեց, որ Նապաթիէի մէջ Հըզպալլայի ենթակառոյցներ, պահեստանոցներ ու մարտական միջոցներ յարձակումի ենթարկած է: