Վրաստանը առանձնայատուկ յարաբերութիւններ ունի դրացի երեք երկիրներու, Հայաստանի, Ազրպէյճանի եւ Թուրքիոյ հետ, եւ այդ յարաբերութիւններու խորացումը կարեւոր դեր ունի երկրի կապակցուածութեան ու տարանցիկ գործառոյթի զարգացման համար: Այս մասին «Իմետի ԼԱՅՎ» հաղորդման ընթացքին յայտարարած է Վրաստանի վարչապետ Իրաքլի Քոպախիծէ:
Վրաստանի վարչապետին համաձայն, ենթակառոյցներուն մէջ իրականացուող լայնածաւալ ներդրումները պիտի նպաստեն երկրի տարանցիկ գործառոյթի հետագայ զարգացման:
«Ասոնք ենթակառոյցներուն մէջ իրականացուող շատ մեծածաւալ ներդրումներ են, եւ այս ամէնը պիտի նպաստէ մեր երկրի տարանցիկ գործառոյթի առաւել զարգացման: Ատոր հետ միասին կը խորացնենք մեր յարաբերութիւնները համապատասխան երկիրներու` մեր շրջանի եւ դրացի երկիրներուն հետ:
«Մենք արտակարգ յարաբերութիւններ ունինք մեր երեք դրացի երկիրներուն` Հայաստանի, Ազրպէյճանի եւ Թուրքիոյ հետ, եւ այս բոլորը առանցքային դեր ունին ինքնին կապակցուածութեան ու տարանցիկ գործառոյթի տեսանկինէն», յայտարարած է Քոպախիծէ: