Ասիոյ բաժակի Բ. կարգի խումբերու ախոյեանութեան, Լիբանանի աղջկանց երիտասարդներու (18 տարեկանէն վար) հաւաքականը 66-59 արդիւնքով պարտութեան մատնեց Ղազախստանը եւ գրաւելէ ետք Բ. խմբակի պարագլուխի դիրքը հասաւ կիսաւարտական:
Մրցումը բաւական հաւասարակշռուած էր առաջին մասին, սակայն Փոլ Քաֆթըրի մարզած Լիբանանի աղջկանց խումբը կրցաւ 23-16 արդիւնքով յառաջանալ, որ մրցումի մինչեւ աւարտը պահեց այդ առաւելութիւնը:
Լիբանանի լաւագոյն երեք մարզիկներն էին Լարա Նաքիպ (Ռիատի), Ժուտի Հարաքէ (Անդրանիկ) եւ ՀՄԸՄ Անթիլիասի հետ վերջերս Լիբանանի ախոյեան դարձած Էլիսա Ապու Ժաուտէ:
Ասիկա Լիբանանի 3-րդ յաղթանակն էր 3 օրուան ընթացքին, նախապէս ան յաղթած էր Քուք կղզիներուն (51-54) եւ Սամոային (84-52):
Հնդկաստան Լիբանանի նման իր 3 մրցումներուն յաղթեց եւ գրաւեց Ա. խմբակի առաջին դիրքը` կիսաւարտականի իր տոմսը ապահովելով:
Քառորդ աւարտականին (այսօր), Ինտոնեզիա պիտի մրցի Սամոայի դէմ, մինչ Ղազախստան պիտի մրցի Թայլանտի դէմ:
Կիսաւարտականին` վաղը, Լիբանան պիտի մրցի Ինտոնեզիա-Սամոա մրցումին յաղթականին դէմ, մինչ Հնդկաստան` Ղազախստան-Թայլանտ մրցումին յաղթականին դէմ:
Կիրակի օր տեղի պիտի ունենայ աւարտական մրցումը: