Թուրքիոյ նախագահ Ռեճեփ Թայիփ Էրտողան յայտարարեց, որ Սուրիոյ եւ Լիբանանի վրայ իսրայէլեան յարձակումները հասան փուլի մը, ուր այլեւս Թուրքիոյ եւս սպառնալիք կը ներկայացնեն:
«Իսրայէլ իր ստեղծումէն ի վեր մեր շրջանին մէջ խաղաղութեան եւ կայունութեան սպառնալիքի դեր կը խաղայ», աւելցուց ան` նշելով, որ Թուրքիոյ անվտանգութիւնը Պէյրութէն ու Դամասկոսէն կը սկսի:
«Արտօնեցէ՛ք յստակ ըսել` ոչ ոք պէտք է արկածախնդրութիւն փնտռէ, եւ ոչ ոք պէտք է լծուի սիոնական ջարդարարներու ցանցի կառքին: Եթէ ոեւէ մէկը փորձէ Արեւելեան Միջերկրական ծովուն մէջ Թուրքիոյ եւ կիպրացի թուրքերու իրաւունքներուն ու շահերուն նկատմամբ ոտնձգութիւն կատարել, կ՛ուզեմ, որ իմանաք` մեր պատասխանը պիտի ըլլայ շատ յստակ եւ շատ վճռական: Իսրայէլը պէտք է կանգնեցուի», Արդարութիւն ու բարգաւաճում կուսակցութեան երեսփոխաններուն առջեւ նշած է Էրտողան` անդրադառնալով Կիպրոսի եւ Ֆրանսայի միջեւ Կիպրոսի մէջ ֆրանսացի զինուորներու տեղակայման վերաբերող համաձայնագիրի ստորագրման:
Նեթանիահու Կը Հակադարձէ
Իսրայէլի վարչապետ Պենիամին Նեթանիահու հակադարձեց Էրտողանին Իսրայէլը «մարդկութեան սպառնալիք» նկատող եւ անոր Սուրիոյ ու Լիբանանի մէջ գործողութիւնները Թուրքիոյ սպառնալիք ներկայացնելու մասին յայտարարութեան` նշելով. «Էրտողան, որ իր ժողովուրդը բռնաճնշումի կ՛ենթարկէ, իր քաղաքական հակառակորդները կը բանտարկէ եւ Համաս շարժումին կ՛աջակցի, Իսրայէլին բարոյական դասեր տալու կարող վերջին անձն է»:
Ան ընդգծեց, որ Իսրայէլ իր բանակին ճամբով պիտի շարունակէ գործել շրջանին մէջ Իրանի եւ անոր դաշնակիցներուն դէմ, «որոնք Միջին Արեւելքին եւ աշխարհին սպառնալիք կը ներկայացնեն»: