Պիելոռուսիոյ, Ղազախստանի, Խըրխըզիստանի եւ Ռուսիոյ նախագահները որոշած են, որ Հայաստանի նկատմամբ Եւրասիական տնտեսական միութեան (ԵԱՏՄ) մասին պայմանագիրի գործողութեան դադրեցման հաւանական հետեւանքներուն մասին դեկտեմբեր 2026 թուականին նիստի ժամանակ պիտի զեկուցեն ԵԱՏՄ-ի միջկառավարական խորհուրդին մէջ այդ չորս երկիրներու անդամները:
ԵԱՏՄ-ի անդամ չորս պետութիւններու ղեկավարները Ասթանայի մէջ որդեգրուած յայտարարութեամբ, որ հրապարակուած է Քրեմլինի պաշտօնական կայքին մէջ, նաեւ «կը կիսեն Հայաստանի մէջ կարելի եղածին չափ կարճ ժամկէտներու մէջ Եւրոպական Միութեան անդամակցելու կամ Եւրասիական տնտեսական միութեան կազմին մէջ մնալու հարցով հանրաքուէ կատարելու անհրաժեշտութեան վերաբերեալ դիրքորոշումը», որ նախապէս ներկայացուցած էր Ռուսիոյ նախագահ Վլատիմիր Փութինը:
Յայտարարութեան համաձայն, որոշումը տրուած է` «հաշուի առնելով Եւրոպական Միութեան անդամակցելուն ուղղուած Հայաստանի Հանրապետութեան գործողութիւնները, ներառեալ 2025 թուականին «Եւրոպական Միութեան Հայաստանի Հանրապետութեան անդամակցութեան հոլովոյթի մեկնարկի մասին» օրէնքի` Ազգային ժողովի հաւանութեան արժանանալը եւ նախագահի կողմէ ստորագրուիլը, ինչպէս նաեւ Եւրոպական Միութեան կողմէ Հայաստանի Հանրապետութեան կառավարութեան եւրոպական ձգտումներու հաստատումը` արտայայտուած Հայաստան-Եւրոպական Միութեան առաջին վեհաժողովի արդիւնքներով 5 մայիս 2026 թուականին որդեգրուած միացեալ հռչակագիրին մէջ»:
Յայտարարութեան հեղինակները կը պնդեն, որ Եւրոպական Միութեան անդամակցելուն Հայաստանի պատրաստութեան հետ կապուած էական ռիսքեր կան ԵԱՏՄ-ի անդամ պետութիւններու տնտեսական անվտանգութեան համար, ինչպէս նաեւ անհրաժեշտ է «կանխարգիլել ատոր հետ կապուած վնասը Միութեան անդամ պետութիւններուն նկատմամբ»:
Ասթանայի մէջ Եւրասիական բարձրագոյն տնտեսական խորհուրդի նիստի ժամանակ չորս երկիրներու ղեկավարները յայտարարութիւնը փոխանցած են Հայաստանի Հանրապետութեան փոխվարչապետ Մհեր Գրիգորեանին:
Գրիգորեան վերահաստատած է, որ Հայաստանը ԵԱՏՄ-էն դուրս գալու մտադրութիւն չունի: