Իրան, ՄԱԿ-ի Ընդհանուր քարտուղարին յղուած նամակի մը մէջ, վերահաստատեց յարձակումի ենթարկուելուն պարագային Միջին Արեւելքի մէջ ամերիկեան ռազմակայաններուն դէմ իր սպառնալիքները:
ՄԱԿ-ի մէջ Իրանի դեսպանը ՄԱԿ-ի ընդհանուր քարտուղար Անթոնիօ Կութիերեսին իր յղած նամակին մէջ գրեց. «Եթէ Իրան զինուորական յարձակումի ենթարկուի, վճռական ու պատշաճ կերպով պիտի հակադարձէ ՄԱԿ-ի կանոնադրութեան 51-րդ յօդուածին մէջ նշուած ինքնապաշտպանութեան սկզբունքին համաձայն»:
«Այդպիսի պայմաններուն մէջ, շրջանին մէջ ամերիկեան բոլոր ռազմակայանները, ենթակառոյցներն ու դրամագլուխները օրինական թիրախներ կը նկատենք», աւելցուց ան:
Նախքան այդ, Միացեալ Նահանգներու նախագահ Տանըլտ Թրամփ յայտարարեց. «Այսպէս կամ այնպէս Իրանի վերաբերեալ համաձայնութեան պիտի հասնինք»:
«Իրանի հետ համաձայնութեան հասնելու համար առաւելագոյնը 15 օր կայ, այլապէս անոնց համար ցաւալի պիտի ըլլայ», նշեց Թրամփ: