Լիոնել Մեսսի կրնայ անակնկալի բերել բոլորը` վերադառնալով իր պատանեկան տարիներու Նիուելզ Օլտ Պոյզ ակումբը:
38 տարեկան Մեսսի վերջերս «Միրըր»-ի լուրերէն մէկուն մէջ նշած էր, թէ կրնայ վերադառնալ Արժանթին, ուր 7 տարիներ բոլորած էր պատանեկան օրերուն` 13 տարեկանին Պարսելոնային միանալէն առաջ:
Մեսսի, որ անցեալ հոկտեմբերին նոր պայմանագրութիւն ստորագրած էր Ինթեր Մայեմիի հետ, միշտ ունեցած է Նիուելզ Օլտ Պոյզի հետ խաղալու երազը:
Արժանթինցին 234 կոլեր նշանակած է Նիուելզի պատանեկան խումբերուն հետ եւ նոյնիսկ մարզադաշտին մէջ իր անունով կոչուած թրիպիւն մըն ալ ունի: Ըստ երեւոյթին մօտիկ ապագային ան դաշտ ալ պիտի ներկայանայ անոնց շապիկով:
Նոյնիսկ հարցազրոյցի մը ընթացքին, ակումբի փոխնախագահ Խուան Մանուէլ Մետինա հաստատած էր որ բանակցութիւններ կը վարեն Մեսսին ձեռք բերելու մօտիկ ապագային (2027-ի առաջին մասին): Այս ծրագիրը Նիուելզէն աւելի վեր բան մըն է: Ասիկա Ռոզարիօ քաղաքի ընդհանուր ծրագիրներէն մէկն է, որ կրնայ յառաջացնել ամբողջ շրջանի ենթակառոյցը ի մարզական ապագան», նշած է «Միրըր»-ի լուրը:
Միւս կողմէ, Քրիսթիանօ Ռոնալտօ ըստ երեւոյթին իր բողոքի արարքը պիտի շարունակէ յաջորդական երկրորդ մրցումը ըլլալով:
Երէկ 41 տարեկան դարձած Ռոնալտօ երկուշաբթի օր մերժած էր դաշտ ներկայանալ Ռիատ խումբին դէմ մրցումին, Սէուտական Արաբիոյ Պետական ներդրումային հիմնադրամը այպանելով, որ նոյնքան հոգ չի տանիր Նասր ակումբին, որքան Հիլալին:
Սէուտական Արաբիոյ Պետական ներդրումային հիմնադրամը (Փի. Այ. Էֆ.), որ սեփականատէրն է Հիլալի, Նասրի, Ահլիի եւ Իթթիհատի, փոխանցումներու ժամանակ ոչ մէկ մարզիկ ձեռք բերած էր ի նպաստ Նասրի, բան մը, որ զայրացուցած էր Ռոնալտոն: Աւելի՛ն. Քարիմ Իթթիհատը լքելով միացած էր Հիլալին, բան մը, որ աւելի եւս «կատղեցուցած» էր Ռոնալտոն, որ միշտ ալ կը նկատէր, որ Ֆետերասիոնը Հիլալին «տարբեր աչքով կը նայի»:
Այսօր Նասր Իթթիհատի դէմ մրցում ունի կատարելիք: Յաղթանակի պարագային Նասր պիտի գրաւէ պարագլուխի դիրքը:
«Քրիսթիանօ Ռոնալտօ պիտի շարունակէ նստիլ արհեստի աթոռներուն վրայ եւ նոյնիսկ լքելու մասին կը մտածէ, եթէ ան խոստումներ չստանայ ապագայի քայլերու գծով: Ան հաստատ խոստումներ կ՛ուզէ լսել «Փի. Այ.Էֆ.»-էն վարչական փոփոխութիւններու գծով, թէ ոչ ան յունիսին կրնայ լքել խումբը: Հակառակ մեծ թիւով կոլեր նշանակելուն, Նասր տակաւին չկրցաւ ախոյեան դառնալ», կը գրէ «Միրըր»:
Նշենք, որ Ռոնալտօ 2023-ի յունուարին միացած էր Նասրին` անոր հետ կատարելով 95 մրցումներ եւ նշանակելով 91 կոլեր:
– Սպանիոյ Աթելթիքօ Մատրիտ ակումբը լրջօրէն հետաքրքրուած է Թոթենհամի արժանթինցի յետսապահ Քրիսթիան Ռոմերոյով:
Ռոմերօ վերջերս խստօրէն քննարկած էր Թոթենհամը ոչ բաւարար թիւով մարզիկներ ունենալուն համար:
Մարզիչ Թոմաս Ֆրանք միայն 4 մարզիկներ ունէր պահեստի աթոռներուն վրայ, մինչ մնացեալ մարզիկները երիտասարդներու խումբին մաս կը կազմէին Մանչեսթըր Սիթիի դէմ մրցումին:
«Լա Լիկա»-ի լաւագոյն ակումբներէն Աթլեթիքօ անցեալ ամրան չէր կրցած նիւթական աղբիւրներ գտնել հովանաւորելու այդ փոխանցումը:
Անցեալ դեկտեմբերէն ի վեր, Ճեսի Լինկարտ Սէուլ Ֆ. Ք. ակումբը լքելէ ետք առանց ակումբի կը մնայ: Նետերլանցի Ռոպին Վան Փերսի կրնայ զինք միացնել Ֆեյենուրտ ակումբին:
Ըստ «Տէյլի Մէյլ»-ին Ֆեյենուրտ կը հանդիսանայ այդ ակումբներէն մէկը, որոնք կապի մէջ մտած են Մանչեսթըր Եունայթըտի եւ Ուեսթ Համի նախկին միջնապահ Ճեսի Լինկարտի հետ: 33 տարեկան անգլիացի մարզիկը այս շաբաթավերջին հաւանաբար վերջնական որոշում տայ իր ապագային գծով: