ՀՀ տարածքային կառավարման նախարար Դավիթ Խուդաթյանը իր ամփոփիչ մամուլի ասուլիսի ընթացքում, անդրադառնալով Շիրակի մարզպետ Դավիթ Առուշանյանի հնարավոր պաշտոնանկության մասին շրջանառվող լուրերին, նշել է, որ դրանք իրականությանը չեն համապատասխանում, և իշխանությունները գոհ են նրա աշխատանքից․ Շիրակի մարզպետի փոփոխություն չեն նախատեսում։
Այնուամենայնիվ, որ դեկտեմբերի վերջին ՀՀ կառավարության ղեկավարը մտադիր էր պաշտոնազրկել Դավիթ Առուշանյանին, չի հերքել նաև Նիկոլ Փաշինյանը։
Այն, որ ՔՊ-ում նման քննարկում եղել է, սակայն վերջնական որոշում չի կայացվել, լրատվամիջոցների հետ զրույցում խոստովանել էր նաև հենց Դավիթ Առուշանյանը։
Բացի այդ, Շիրակի մարզպետարանից ևս տեղեկություններ էին ստացվում, որ պարոն Առուշանյանի մոտ առկա էր所谓 «ճամպրուկային տրամադրություն»։
Թե ինչու վերջիվերջո փոշմանեցին և չպաշտոնազրկեցին նրան մարզպետի պաշտոնից, քաղաքագետ Գագիկ Համբարյանը բացատրում է բացառապես համապատասխան կադրերի բացակայությամբ։
«Դավիթ Առուշանյանի հրաժարականի վերաբերյալ խոսակցությունները ոչ թե ասեկոսեների մակարդակով էին, այլ հաստատված է, որ հարցը քննարկվել է կառավարության մակարդակով։ Այն պահին, երբ հարցը քննարկվում էր, կառավարությունից չեն հերքել, չեն ասել, որ նման բան չկա։
Բացի այդ, Գյումրիում շատ կոնկրետ անուններ էին շրջանառվում՝ թե ում են առաջարկել դառնալ մարզպետ և ովքեր էին ինքնառաջադրվել։ Ոմանք հրաժարվել էին առաջարկից, մյուսներն էլ համարվում էին առավել խնդրահարույց դեմքեր, ինչի պատճառով, ենթադրաբար, իշխանությունները հրաժարվել էին նրանց թեկնածություններից։
Ինչպես տեսնում ենք, Նիկոլ Փաշինյանի՝ դեկտեմբերի 7-ին Գյումրու Սուրբ Յոթ Վերք եկեղեցում բեմականացված պատարագի տապալման շուրջ առաջացած զայրույթը կամաց-կամաց հանդարտվեց։ Սա ունի մեկ պատճառ՝ համապատասխան թեկնածու չգտնվեց, որը կստանձներ Շիրակի մարզպետի պաշտոնը և խորհրդարանական ընտրություններին ընդառաջ պատասխանատվություն կկրեր նախապատրաստական աշխատանքներ իրականացնելու համար։
Այն հայտարարությունները, թե իշխանությունները շատ գոհ են մարզպետից, ընդամենը սեփական անճարությունը թաքցնելու միջոց են, քանի որ Գյումրին փոքր քաղաք է․ այստեղ բոլորը մեկմեկու լավ ճանաչում են, և լուրերը շատ արագ ու բավականին ստույգ տարածվում են»,– ասում է Գագիկ Համբարյանը։
Նունե ԱՐԵՎՇԱՏՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: