Ինքնախրախուսման հարցը՝ վարչապետի պարգևավճարների օրինակով
AntiCor-ը ուսումնասիրել է 2021–2025 թվականներին վարչապետի աշխատակազմում պարգևավճարների կիրառման մեխանիզմը՝ կենտրոնանալով վարչապետ Նիկոլ Փաշինյանի կողմից ստացված դրամական խրախուսումների վրա։
Համաձայն կառավարության կողմից տրամադրված պաշտոնական տեղեկատվության՝ վարչապետը 2025 թվականի առաջին կիսամյակի համար ստացել է շուրջ 11 մլն 950 հազ. դրամ պարգևավճար, ինչպես նաև մոտ 1 մլն 970 հազ. դրամ՝ առանձին տողով։ Նույն ժամանակահատվածում վարչապետի աշխատակազմի աշխատակիցները, վարչապետն ու երկու փոխվարչապետները միասին ստացել են 2 մլրդ 835 մլն 550 հազ. դրամ պարգևատրում։
Օրինակա՞ն է արդյոք, երբ վարչապետը «ինքն իրեն» է պարգևատրում
Ձևական օրինականություն.
Կառավարությունը հղում է անում 2025թ. նոյեմբերի 27-ին ընդունված որոշմանը՝ կատարողականի գնահատման պիլոտային կարգի մասին։ Ըստ այդ մեխանիզմի՝ առաջնահերթությունները ներկայացվում են կառավարման մարմինների ղեկավարների կողմից, քննարկվում փոխվարչապետների հետ, իսկ վերջնական գնահատականները կարող են ճշգրտվել հենց վարչապետի կողմից։ Այս շրջանակում վարչապետի պարգևավճարի տրամադրումը ձևականորեն տեղավորվում է գործող ենթաօրենսդրական կարգավորման մեջ։
Բովանդակային խնդիրը.
Սակայն այստեղ առկա է ակնհայտ շահերի բախման ռիսկ․ վարչապետը ներգրավված է այն գնահատման գործընթացում, որի արդյունքներով ինքն է դառնում խրախուսման շահառու։ Չկա անկախ մարմին կամ արտաքին վերահսկողություն, որը կբացառեր ինքնախրախուսման հնարավորությունը կամ կապահովեր իրական հաշվետվողականություն։
AntiCor-ի գնահատականը
Թեպետ կիրառված մեխանիզմը ձևական առումով չի հակասում գործող իրավական ակտերին, այն խոցելի է հանրային վստահության տեսանկյունից և հակասում է լավ կառավարման ու հակակոռուպցիոն միջազգային չափանիշներին։ Բարձրագույն գործադիր պաշտոն զբաղեցնող անձի խրախուսումը պետք է իրականացվի անկախ, թափանցիկ և ինքնուրույն որոշումներից զերծ կարգով։
AntiCor-ը փաստում է․ ձևական օրինականությունը չի հավասարազորում հանրային արդարացվածությանը։
Նյութն ամբողջությամբ՝ սկզբնաղբյուր կայքում:
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: