Վենեսուելայի կառավարությունը սկսել է ազատ արձակել կալանավորներին, որոնց մարդու իրավունքների պաշտպանության խմբերը համարում են քաղբանտարկյալներ․ գրում է BBC-ն։
Իսպանիայի արտաքին գործերի նախարարությունը հայտարարել է, որ իրենց 5 քաղաքացի է ազատ արձակվել։ Նրանց թվում է նաև վենեսուելացի-իսպանացի իրավապաշտպան Ռոսիո Սան Միգելը։
Որոշումն ընդունվել է այն բանից հետո, երբ ԱՄՆ-ն անցած շաբաթ օրը Վենեսուելայի մայրաքաղաք Կարակասում կայծակնային հարձակման ժամանակ ձերբակալեց նախագահ Նիկոլաս Մադուրոյին։
Նշվում է, որ Վենեսուելայում քաղբանտարկյալների ազատ արձակումն ԱՄՆ-ի վաղեմի պահանջն է։
Վենեսուելայի Ազգային ժողովի ղեկավար և ժամանակավոր նախագահ Դելսի Ռոդրիգեսի եղբայր Խորխե Ռոդրիգեսը պետական հեռուստատեսությամբ հայտարարել է, որ «նշանակալի թվով» բանտարկյալներ անմիջապես ազատ կարձակվեն։ Նա, սակայն, չի նշել ազատ արձակվող բանտարկյալների թիվը կամ ինքնությունը։
Ռոդրիգեսի խոսքով՝ երկրի ժամանակավոր կառավարությունը բանտարկյալներին ազատ է արձակում «ազգային միասնության և խաղաղ համակեցության» շահերից ելնելով։