Ուկրաինայի անդամակցությունը Եվրամիությանը չի երաշխավորի նրա անվտանգությունը, այլ կստեղծի պատերազմի սպառնալիք Ռուսաստանի հետ ամբողջ Եվրոպայի համար։ Այս մասին հայտարարել է Հունգարիայի արտաքին գործերի նախարար Պետեր Սիյարտոն, որը մասնակցել է Բրյուսելում ԵՄ արտաքին գործերի նախարարների հանդիպմանը։
«Մենք՝ հունգարացիներս, Ուկրաինայի անդամակցությունը Եվրամիությանը դիտարկում ենք ոչ թե որպես ուկրաինացիների անվտանգության երաշխիք, այլ որպես պատերազմի սպառնալիք ամբողջ Եվրոպայի համար», – ասել է Սիյարտոն Բելգիայի մայրաքաղաքում հունգարացի լրագրողների հետ զրույցում։ Նրա մամուլի ասուլիսը հեռարձակվել է M1 հեռուստաալիքով։
Նախարարը հիշեցրել է, որ Ուկրաինան գտնվում է զինված հակամարտության մեջ Ռուսաստանի հետ, և, հետևաբար, նրա անդամակցությունը կստեղծի «հսկայական սպառնալիք ամբողջ Եվրամիության համար»։
Հունգարիայի կառավարությունը նախկինում բազմիցս հայտարարել է, որ դեմ է Ուկրաինայի շտապողական անդամակցությանը ԵՄ-ին, քանի որ դա կհանգեցնի Ռուսաստանի հետ ուղղակի ռազմական բախման և կունենա ծայրահեղ բացասական ազդեցություն եվրոպական երկրների տնտեսությունների վրա։
Արևմտյան երկրների կողմից Ուկրաինայի անվտանգության երաշխիքների հարցը քննարկվում է ուկրաինական հակամարտության խաղաղ կարգավորման համատեքստում։