ԵՐԵՎԱՆ, 11 դեկտեմբերի․/ԱՌԿԱ/․ Վերջին ամիսներին Հայաստանում դոլարայնացման մակարդակը պատմական ամենացածր մակարդակում է: Այս մասին հայտնում են ՀՀ կենտրոնական բանկից։
Մասնավորապես, 2025 թ․ հոկտեմբերին ռեզիդենտների արտարժութային ավանդների և ռեզիդենտների ընդհանուր ավանդների հարաբերակցությամբ գնահատվող դոլարայնացման մակարդակը Հայաստանում կազմել է 34.2%։
Սա հայկական դրամի և ֆինանսական համակարգի կայունության նկատմամբ հասարակության վստահության կարևոր ցուցանիշ է:
Կենտրոնական բանկի կայքում ներկայացված տվյալների համաձայն՝ դոլարայնացման մակարդակը կայունորեն նվազում է 2023 թվականի մարտից, երբ այն կազմել է 43.7%։ Կարգավորողի 2025 թվականի հոկտեմբերի 31-ի տվյալների համաձայն՝ 7.01 տրիլիոն դրամ ծավալով ընդհանուր ավանդների կառուցվածքից ռեզիդենտների ավանդները կազմել են 5.53 տրիլիոն դրամ, որից 3.63 տրիլիոն դրամը դրամային ավանդներ են, իսկ 1.89 տրիլիոն դրամը՝ արտարժույթով ավանդներ։ ($1 = 381.82 դրամ)