Երեւանի ավագանու նիստում այսօր «Հանրապետություն» խմբակցության անդամ Անի Խաչատրյանը առաջարկեց հանել օրակարգից Նոր Նորք վարչական շրջանի Գայի պողոտայում բազմաբնակարան շենքի կառուցման գործունեության իրականացմանը նախնական համաձայնություն տրամադրելու մասին հարցը:
Տիգրան Ավինյանը որոշեց հարցը հանել: «Մայր Հայաստան» խմբակցությունից Մանուկ Սուքիասյանը առաջարկեց հարցը չհանել, այլ դարձնել զեկուցվող: Ըստ նրա՝ օրակարգից հարցի հանումը ուղիղ ճանապարհ է, որ հարցը ստանա դրական եզրակացություն: Բայց Ավինյանը նշեց, որ հարցն արդեն հանվել է:
Սուքիասյանը նաեւ առաջարկեց 2026-28 թթ միջնաժամկետ ծախսերի ծրագիրը եւս դարձնել զեկուցվող: Սակայն ավագանու անդամների մեծամասնությունը դեմ քվեարկեց այդ առաջարկին, ինչը «Մայր Հայաստան» խմբակցության անդամների վրդովմունքը առաջացրեց: Նրանք իրենց տեղերից սկսեցին իրենց վրդովմունքը արտահայտել:
-Այդ հարցը դարձել է չզեկուցվող մոտ տասը րոպե առաջ: Եթե ծախսեր են, մարդիկ պետք է իմանան, չի կարելի ուղղակի ծածկադմփոց անել, գնա: Գայի պողոտայի բազմաբնակարանի հարցն էլ լավ կլիներ իմանայինք: Լիքը մարդ է հավաքվել, լավ կլիներ իրենց լսեինք, այդ թվում երեխաներ: Կնոպկա սեղմոցին թարգեք, քվեարկեցիք գնաց,-«Մայր Հայաստանի» դիրքորոշումը բարձրաձայնեց ավագանու անդամներից մեկը:
-Կնոպկա սեղմոցի չէ, էս դեպքում ձեռք բարձրացնոցի է, վերադարձեք ձեր տեղը,- արձագանքեց Ավինյանը:
Նշենք, որ Գայի պողոտա 45 հասցեի բնակիչներն այսօր բողոքի ցույց էին անում քաղաքապետարանի առջև՝ պահանջելով քաղաքապետ Տիգրան Ավինյանի հետ հանդիպում: Բնակիչները դեմ են հենց իրենց բակում՝ խաղահրապարակի տարածքում բարձրահարկի կառուցմանը: Մի քանի բազմաբնակարան շենքերի հենց մեջտեղում՝ այգու, խաղահրապարակի փոխարեն 18 հարկանի բարձրահարկի կառուցումը վրդովեցրել է բնակիչներին։ Վերջիններս ամիսներ շարունակ պայքարում են իրենց բակում կառուցապատման դեմ։ Բազմաբնակարան շենքը շուրջ 5000 քառակուսի մետր տարածքի կենտրոնական հատվածն է զբաղեցնելու՝ 2200 քմ:
Արփինե ՍԻՄՈՆՅԱՆ
Լուսանկարը ֆեյսբուքյան էջում հրապարակել է ավագանու անդամ Իզաբելլա Աբգարյանը՝ մակագրելով. «Երևանի ավագանու նիստն այսօր կանցնի առաջին հարկում։ Դահլիճը նորոգում են։ Այստեղ մեկ էլ քովիդի ժամանակ էինք նիստ անում»:
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: