Գագիկ Ծառուկեանի ղեկավարած «Բարգաւաճ Հայաստան» կուսակցութիւնը կը մեղադրէ Կեդրոնական ընտրական յանձնախումբը քաղաքական պատուէր կատարելու եւ կուսակցութեան խորհրդարան մուտքը կանխելու համար: Կուսակցութիւնը կը պատրաստուի քաղաքական ու իրաւական քայլերու ձեռնարկել տեղի ունեցող ապօրինութիւնը թոյլ չտալու համար:
«Վահագն Յովակիմեանի գլխաւորութեամբ Կեդրոնական ընտրական յանձնախումբը անմռունչ կերպով կեանքի կոչեց Նիկոլ Փաշինեանի ցանկութիւնը, այն է` թոյլ չտալ «Բարգաւաճ Հայաստան» կուսակցութեան յաղթահարել անցողիկ շեմը», ըսաւ «Բարգաւաճ Հայաստան» կուսակցութեան բանբեր Իվետա Տօնոյեան:
Նախանցեալ օր ուշ երեկոյեան Կեդրոնական ընտրական յանձնախումբը անվաւեր ճանչցած էր երկու տեղամասի քուէարկութեան արդիւնքներ: Այս որոշումին պատճառով ձայներ կորսնցուցին ինչպէս ընդդիմադիր երեք ուժերը, նոյնպէս ալ իշխող Քաղաքացիական պայմանագիրը: Բայց եթէ «Ուժեղ Հայաստան» եւ «Հայաստան» դաշինքներուն համար այս քուէներու կորուստը ըստ էութեան էական չէ, բոլորովին այլ է պատկերը Քաղաքացիական պայմանագիրի եւ «Բարգաւաճ Հայաստան»-ի համար: «Բարգաւաճ Հայաստան» կուսակցութիւնը կրնայ դուրս մնալ խորհրդարանէն, այդ պարագային Քաղաքացիական պայմանագիրը խորհրդարանին մէջ կ՛ունենայ պատգամաւորներու 3/5-ը, որմէ կը զրկուի, եթէ «Բարգաւաճ Հայաստան» կուսակցութիւնը անցնի: