Իտալիոյ ֆութպոլի ազգային խումբը վերջապէս Մոնտիալի զտումի գծով փլէյ-օֆի մրցում մը յաղթեց: 4 անգամ աշխարհի ախոյեան հանդիսացած Իտալիա այժմ կարիք ունի յաղթանակի մը եւս` 3-րդ յաջորդական Մոնտիալէն չբացակայելու համար:
Հինգշաբթի գիշեր Իտալիա Պերկամոյի մէջ 2-0 արդիւնքով պարտութեան մատնեց Հիւսիսային Իրլանտան` փլէյ-օֆի կիսաւարտականի իր մրցումին:
Սանտրօ Թոնալի Բ. կիսախաղի սկիզբէն վոլէով նշանակեց մրցումին առաջին կոլը եւ աւելի ուշ պատրաստեց Մոյս Քինի կոլը:
«Կոլ նշանակելէ ետք, մեր միտքը աւելի հանգիստ էր: Լաւ ելոյթ ունեցանք: Այս յաղթանակը ուժ պէտք է տայ երեքշաբթի օրուան մրցումին… Պէտք է անպայման յաղթել, ուրիշ ճար չունինք», ըսաւ մարզիչ Ճենարօ Կաթուզօ:
Կիսաւարտականի իրենց մրցումները յաղթեցին նաեւ Պոսնիա, Շուէտ, Լեհաստան, Թուրքիա, Քոսովօ, Դանիա եւ Չեխիա:
Իտալիա իր աւարտականի մրցումին պիտի մեկնի Պոսնիա` հասնելու համար Մոնտիալին, որուն վերջին անգամ մասնակցեցաւ 2014-ին, ուր դուրս մնացած էր առաջին հանգրուանէն` 2010-ի մոնտիալին նման:
Պոսնիա Քարտիֆի մէջ 1-1 արդիւնքով հաւասարութիւն արձանագրելէ ետք Կալեսի հետ, կրցաւ փենալթիներով յաղթել 4-3 արդիւնքով, ուր Պոսնիոյ բերդապահ Նիքոլա Վասիլ փրկեց Կալեսի վերջին փենալթին, մինչ Քերիմ Ալայպեկովիչ (18 տարեկան) կրցաւ նշանակել վերջին փենալթին` յաղթանակը նուիրելով Պոսնիոյ:
Նշենք, որ Էտին Ճեքօ (40 տարեկան) նշանակած էր Պոսնիոյ հաւասարութեան կոլը 86-րդ վայրկեանին:
Իտալիա 2018-ի մոնտիալի զտումէն դուրս մնացած էր` չկարենալով յաղթել Շուէտին, ապա Մակեդոնիոյ դէմ 2022-ի Մոնտիալի զտումին անակնկալ պարտութիւն կրելով ձախողած էր հասնելու:
Իտալիա ընդհանրապէս դժուարութիւն ունեցած է արեւելեան եւրոպական խումբերու հետ մրցումներու ընթացքին, բայց անպայման պիտի փորձէ երեքշաբթի օր այդ չար բախտը կոտրել:
Արսենալի յառաջապահ Վիքթոր Եոքերեշ հեթ-թրիք մը իրագործեց, եւ Շուէտ 3-1 արդիւնքով դուրս ձգեց Ուքրանիան: Եոքերեշ 2024-էն ի վեր ազգային խումբին հետ կոլ չէր նշանակած, մանաւանդ Մոնտիալի զտումի ձախող մրցումներուն գրեթէ անկայուն էր:
Շուէտ աւարտականին պիտի մրցի Լեհաստանի դէմ, որուն 37 տարեկան յառաջապահ Ռոպերթ Լեվանտովսքին գլխու կարեւոր հարուածով նշանակեց 2-1-ի կոլը` Ալպանիոյ դէմ, յոյսերը պահելով յաջորդական 3-րդ մոնտիալը խաղալու:
Ալպանիա կիսախաղէն քիչ մը առաջ նշանակեց մրցումին առաջին կոլը, մինչ Լեհաստանի միւս կոլը նշանակեց Փիոթր Զիլինսքի:
Քոսովօ յաղթանակի մը կարիքը ունի` առաջին անգամ ըլլալով Մոնտիալի հասնելու համար, երկու անգամ ետ մնալէ, վերադառնալէ եւ յաղթելէ ետք Սլովաքիոյ 4-3 արդիւնքով:
Քոսովօ պիտի մրցի Թուրքիոյ դէմ, որ 1-0 արդիւնքով պարտութեան մատնեց Ռումանիան:
Կուսթաֆ Իսաքսեն 2 կոլ նշանակեց 2 վայրկեաններու ընթացքին, եւ Դանիա 4-0 արդիւնքով դուրս ձգեց Մակեդոնիան:
Դանիոյ մրցակիցը պիտի ըլլայ Չեխիա, որ 4-3 փենալթիներու արդիւնքով պարտութեան մատնեց Իրլանտան, որ պահ մը 2-0 արդիւնքով կը յաղթէր, բայց տեղի տուաւ Չեխիոյ դիմաց: