Ռուսաստանի Իվանովոյի մարզում կործանվել է Ан-22 բեռնատար ինքնաթիռը, հայտնում է ՏԱՍՍ-ը՝ հղում անելով օպերատիվ ծառայություններին։
Օդանավում եղել է 7 մարդ։ Աղետը տեղի է ունեցել Ուվոդի ջրամբարի շրջանում, ինքնաթիռի մասերը հայտնաբերվել են ջրի վրա, գործակալությանը հայտնել է աղբյուրը։
Ռուսաստանի պաշտպանության նախարարությունն արդեն հաստատել է ռազմա-տրանսպորտային ինքնաթիռի կործանման լուրը։ Ըստ նախարարության՝ աղետը տեղի է ունեցել օդանավի վերանորոգումից հետո թռիչքի ժամանակ։
«Ինքնաթիռն ընկել է անմարդաբնակ շրջանում։ Փրկարարաորոնողական խմբերը մեկնել են վթարի վայր՝ անձնակազմի ճակատագիրը պարզելու համար»,- նշված է գերատեսչության հաղորդագրության մեջ։
Ан-22 Անթեյը խորհրդային ծանր տուրբապտուտակավոր տրանսպորտային ինքնաթիռ է, աշխարհում այդ դասի ամենամեծ եւ առաջին լայնաֆյուզելյաժային օդանավը։ Այն նախատեսված է մեծ հեռավորություններ ծանր եւ խոշորաչափ ռազմական տեխնիկա, ինչպես նաեւ օդային դեսանտ տեղափոխելու համար։ Այս ինքնաթիռներն առաջին անգամ երկինք են բարձրացել 1965 թվականին։