Ռուսական ցորենի խմբաքանակը Հայաստան է հասել Ադրբեջանի և Վրաստանի միջոցով, հայտարարել է էկոնոմիկայի նախարար Գևորգ Պապոյանը։
«Սա ռուսական ցորեն է, որը Ռուսաստանի տարածքով երկաթուղով եկել էր Ադրբեջան և քանի այս պահին Հայաստան-Ադրբեջան ուղիղ երկաթուղային հաղորդակցություն մենք չունենք, մտել էր Վրաստան և Վրաստանից Հայաստան», – հայտարարել նա Հանրային հեռուստատեսության եթերում։
Նախարարի խոսքով, երբ TRIPP երթուղին բացվի և Մեղրիով հաղորդակցություն լինի, նման բեռնափոխադրումները կիրականացվեն Ռուսաստանից Ադրբեջան, այնուհետև Հայաստանի միջոցով՝ Նախիջևան, և վերջապես կհասցվեն Հայաստան։
Պապոյանը նաև հավելել է, որ առաջիկա մի քանի օրերին Ղազախստանից ցորենը նույնպես կստացվի Ադրբեջանի միջոցով։ «Սա բոլորովին նոր հնարավորություն է, որովհետև այս պահին փաստացի կա նաև Չինաստան-Հայաստան երկաթուղային ուղիղ հաղորդակցություն», – հայտարարել է նա։
Նշելով, որ նման մատակարարումները սովորաբար կատարվում էին Վերին Լարսի անցակետով, Պապոյանը մատնանշել է այս երթուղու հետ կապված «հիմնական դժվարություններն ու հերթերը», ինչպես նաև ճանապարհային տրանսպորտի բարձր արժեքը։ Միևնույն ժամանակ, նախարարն ընդգծել է, որ հայկական կողմը կշարունակի ակտիվորեն օգտագործել Վերին Լարսի ճանապարհը։
Պապոյանի խոսքով՝ Ադրբեջանի միջոցով մատակարարումները կլուծեն անխափան մատակարարման, դիվերսիֆիկացման և Հայաստանում ցորենի գնի նվազման հարցերը։ Սակայն նա չի նշել հացահատիկի գների կոնկրետ նվազման հարցը՝ ասելով, որ դա կախված է տարբեր գործոններից։
Էկոնոմիկայի նախարարը նաև հայտնել է, որ Ռուսաստանից և Ղազախստանից ցորենի վերոնշյալ երկու խմբաքանակները, որոնցից յուրաքանչյուրը կազմում է 1000 տոննա, գնվել են Հայաստանում գործող մասնավոր ընկերության կողմից։ «Սա պետական գնում չէ, մասնավոր գնում է։ Մասնավորը գումարը փոխանցել է Ռուսաստան և Ղազախստան, բարձել են այնտեղ ցորենը, որը հասավ Հայաստան», – ասել է նա։
Հոկտեմբերի 21-ին Ղազախստան կատարած պետական այցի ժամանակ Ադրբեջանի նախագահ Իլհամ Ալիևը հայտարարել էր, որ Ադրբեջանը վերացրել է Հայաստան բեռների տարանցման բոլոր սահմանափակումները։ Առաջին նման տարանցիկ խմբաքանակը ղազախական ցորենի տեղափոխումն էր Հայաստան։ ՀՀ վարչապետ Նիկոլ Փաշինյանը կարևորել էր Ալիևի հայտարարությունը: Ռուսաստանի փոխվարչապետ Ալեքսեյ Օվերչուկը հայտարարել էր, որ Ադրբեջանը հաստատել է ռուսական արտադրանքի տարանցման հնարավորությունն Ադրբեջանի երկաթուղիներով դեպի Հայաստան։
