Զոհրան Մամդանին կդառնա Նյու Յորքի հաջորդ քաղաքապետը։ Քվեարկության արդյունքները դեռ չեն ամփոփվել, սակայն ամերիկյան հեռուստաընկերությունների հետընտրական կանխատեսումները քիչ հնարավորություն են թողնում նրա մրցակիցների համար, որոնք ընդունել են իրենց պարտությունը. գրում է BBC-ն։
Մամդանին իրեն սոցիալիստ է ներկայացնում։ Նշենք, որ ԱՄՆ նախագահ Դոնալդ Թրամփը փորձեց կանխել նրա հաղթանակը՝ ընտրողներին կոչ անելով քվեարկել մեկ այլ դեմոկրատի օգտին։
Ընտրությունները դեմոկրատներին նաև հաջողություն բերեցին Վիրջինիայում, Նյու Ջերսիում և Կալիֆոռնիայում։
Դեմոկրատ Զոհրան Մամդանին հաղթել է Նյու Յորքի քաղաքապետի ընտրություններում՝ հավաքելով ձայների 50.4%-ը, ըստ BBC-ի ամերիկյան գործընկեր CBS-ի։ CNN-ը նույնպես կանխատեսում է, որ Մամդանին կդառնա հաջորդ քաղաքապետը։
Իր հաղթական ելույթում 34-ամյա քաղաքական գործիչը կենտրոնացավ նախընտրական խոստումների և հույսի ուղերձի վրա. «Քաղաքական խավարի ժամանակաշրջանում Նյու Յորքը լույս կլինի», – ասաց նա։
Նա նաև հիշեց ԱՄՆ նախագահին, որը կոչ էր արել մետրոպոլիսի բնակիչներին չքվեարկել Մամդանիի օգտին և խոստացավ նվազագույնի հասցնել Նյու Յորքին տրամադրվող դաշնային ֆինանսավորումը, եթե նա հաղթի։
«Դոնալդ Թրամփ, քանի որ գիտեմ, որ դու դիտում ես ինձ, ունեմ երեք բառ քեզ համար. բարձրացրու ձայնը», – ասաց Մամդանին ամբոխի ծափահարությունների ներքո։
34-ամյա Մամդանին կդառնա Նյու-Յորք քաղաքի ամենաերիտասարդ քաղաքապետը՝ 1892 թվականից ի վեր, ինչպես նաև առաջին մահմեդականը և աֆրոամերիկացին (նա ծնվել է Ուգանդայում), որը կզբաղեցնի այդ պաշտոնը։
Ընտրությունները տեղի են ունեցել երեկ։ Ընտրական հանձնաժողովը հայտնել է, որ 1969 թվականից ի վեր առաջին անգամ քվեարկել է գրեթե 2 միլիոն մարդ։ Մամդանիից բացի, Նյու Յորքի քաղաքապետի պաշտոնի համար պայքարում էին անկախ դեմոկրատ և Նյու Յորքի նախկին նահանգապետ Էնդրյու Կուոմոն և հանրապետական Քուրթիս Սլիվան։
Կուոմոն արդեն շնորհավորել է Մամդանիին։ CBS-ը կանխատեսում է, որ նա ունի ձայների 41.6%-ը։ Սլիվան, որը ստացել էր մոտ 7%, նույնպես ընդունել է իր պարտությունը։
Ընտրությունների նախօրեին Թրամփը կոչ արեց ընտրողներին քվեարկել ոչ թե իր կուսակից Սլիվայի, այլ Դեմոկրատական կուսակցության անդամ Կուոմոյի օգտին, որն այդ ամռանը պարտվեց նախնական ընտրություններում Մամդանիին: Թրամփը Մամդանիին անվանեց կոմունիստ և սպառնաց կրճատել Նյու Յորք քաղաքին տրամադրվող դաշնային ֆինանսավորումը, եթե նա հաղթի: