2024 թվականին գրանցվել է անչափահասների նկատմամբ սեռական բռնության 98 և ֆիզիկական բռնության 101 դեպք։ Վերջին տարիներին անչափահասների նկատմամբ ֆիզիկական ու սեռական բռնության գործերով աճ է նկատվել հատկապես որոշ հոդվածների մասով։
«Փաստերի ստուգման հարթակն» ուսումնասիրել է անչափահասների նկատմամբ կիրառվող ֆիզիկական ու սեռական բռնության ցուցանիշների միտումները՝ 2021-2025թթ․ ընթացքում։
Այսպես, 2023 թվականին գրանցվել է անչափահասների նկատմամբ սեռական բռնության 90 և ֆիզիկական բռնության 96 դեպք։ Նախորդող տարիներին այս ցուցանիշներն ավելի ցածր են եղել․ 2022 թվականին՝ սեռական բռնության 51 դեպք, ֆիզիկական բռնության 49 դեպք։
Այս տարվա հունվար-հուլիսի տվյալներով արդեն իսկ սեռական բռնության 49 դեպք է գրանցվել, ֆիզիկական բռնության՝ 72 դեպք։
Ֆիզիկական ու սեռական բռնության հոդվածներով արձանագրված դեպքերի ամբողջական վիճակագրական պատկերը ներկայացված է կից աղյուսակում։ 2022 թվականի հուլիսի 1-ից վիճակագրությունը վարվել է՝ հիմք ընդունելով 2022 թվականի մայիսի 5-ին ընդունված ՀՀ Քրեական օրենսգրքի փոփոխությունները։ Մինչ այդ հիմք է ընդունվել 2003 թվականին ընդունված օրենսգիրքը։
| Գրանցված դեպքերը | 2025 (7 ամիս) | 2024 | 2023 | 2022 | 2021 |
| Բժշկական բնույթի հարկադրանքի միջոց նշանակելը, փոփոխելը և դադարեցնելը (Հոդված 117) | 0 | 0 | 1 | — | — |
| Մոր կողմից նորածին երեխայի սպանությունը (Հոդված 106*) | — | — | — | — | 1 |
| Սպանություն (Հոդված 155,104*) | 20 | 13 | 18 | 4 | 3 |
| Ծննդկանի կամ ծննդաբերի կողմից երեխայի սպանություն (Հոդված 157) | 2 | 1 | 1 | — | — |
| Առողջությանը ծանր վնաս պատճառելը (Հոդված 166, 112*) | 7 | 11 | 7 | 5 | 4 |
| Առողջությանը միջին ծանրության վնաս պատճառելը (Հոդված 167,113*) | 22 | 23 | 15 | 7 | 2 |
| Առողջությանը թեթև վնաս պատճառելը (Հոդված 171,117*) | 20 | 46 | 38 | 11 | 11 |
| Ծեծը (Հոդված118*) | — | — | — | 21 | 39 |
| Անզգուշությամբ առողջությանը ծանր վնաս պատճառելը(Հոդված172) | 1 | 7 | 10 | 1 | — |
| Բռնաբարությունը (Հոդված138*) | 3 | ||||
| Սեքսուալ բնույթի բռնի գործողությունները ( Հոդված 198, 139*) | 22 | 39 | 38 | 27 | 12 |
| Սեքսուալ բնույթի գործողություններին հարկադրելը (Հոդված 199) | 1 | 8 | 5 | 1 | — |
| Սեքսուալ բնույթի գործողություններ կատարելը 16 տարին չլրացած անձի նկատմամբ (Հոդված 200,141*) | 15 | 31 | 28 | 17 | 24 |
| Անառակաբարո արարք կատարելը (Հոդված 201,142*) | 11 | 20 | 19 | 6 | 16 |
*Այս նշումով հոդվածները վերաբերում են 2003 թվականի Քրեական օրենսգրքին։
FIP.am-ը ուսումնասիրել է նաև ՀՀ Քննչական կոմիտեի տվյալները՝ անչափահասների նկատմամբ կատարված հանցագործությունների վերաբերյալ հարուցված քրեական վարույթների մասով։
Ըստ այդմ՝ 2025 թվականի առաջին կիսամյակում քննվել և դատարան է ուղարկվել ծանր մարմնական վնաս հասցնելու դեպքով 3, ֆիզիկական ներգործության վերաբերյալ 6 և սեռական ոտնձգությունների վերաբերյալ 20 քրեական վարույթ։
Նույն ժամանակահատվածում կարճվել է ծանր մարմնական վնաս հասցնելու վերաբերյալ 8, միջին ծանրության վնաս հասցնելու վերաբերյալ 14, ֆիզիկական ներգործության վերաբերյալ 57 և սեռական ոտնձգությունների վերաբերյալ 25 քրեական վարույթ։
2024 թվականին դատարան է ուղարկվել ծանր մարմնական վնաս հասցնելու վերաբերյալ 8, միջին ծանրության վնաս հասցնելու վերաբերյալ 1, ֆիզիկական ներգործության դեպքերով 27 և սեռական ոտնձգությունների վերաբերյալ 30 քրեական վարույթ։
Նույն ժամանակահատվածում կարճվել է՝ ծանր մարմնական վնաս հասցնելու վերաբերյալ 10, միջին ծանրության վնաս հասցնելու վերաբերյալ 26, ֆիզիկական ներգործության վերաբերյալ 105 և սեռական ոտնձգությունների վերաբերյալ 17 քրեական վարույթ։
2023 թվականին դատարան է ուղարկվել ծանր մարմնական վնաս հասցնելու վերաբերյալ 5, միջին ծանրության վնաս հասցնելու վերաբերյալ 2, ֆիզիկական ներգործության վերաբերյալ 10 և սեռական ոտնձգությունների վերաբերյալ 13 քրեական վարույթ։ Նույն ժամանակահատվածում կարճվել է՝ ծանր մարմնական վնաս հասցնելու վերաբերյալ 7, միջին ծանրության վնաս հասցնելու վերաբերյալ 15, ֆիզիկական ներգործության վերաբերյալ 50 և սեռական ոտնձգությունների վերաբերյալ 4 քրեական վարույթ։
Այսպիսով, պաշտոնական վիճակագրությունը ցույց է տալիս, որ Հայաստանում անչափահասների նկատմամբ սեռական ոտնձգության դեպքերի աճի միտում կա։ Այդ միտումը արտացոլված է ինչպես հարուցված, այնպես էլ դատարան ուղարկված ու կարճված քրեական վարույթների վիճակագրությունում։
Գայանե Մարկոսյան