Մադրիդի «Ռեալի» ավստրիացի պաշտպան Դավիդ Ալաբան կլքի իր ներկայիս ակումբը ընթացիկ մրցաշրջանից հետո, հայտնում է ինսայդեր Ֆաբրիցիո Ռոմանոն։
Աղբյուրի տեղեկություններով՝ «արքայական» ակումբի մարզչական շտաբը՝ Խաբի Ալոնսոյի գլխավորությամբ, դժգոհ է խաղացողի մշտական վնասվածքներից, որոնք չափազանց հաճախ են կրկնվում և ֆուտբոլիստին թույլ չեն տալիս թիմին օգնել կարևոր պահերին։
32-ամյա ավստրիացու գործող պայմանագրի ժամկետը մադրիդյան գրանդի հետ ավարտվում է 2026 թվականի հունիսին, որից հետո նա կդառնա ազատ գործակալ։ «Սերուցքայինների» նախագահ Ֆլորենտինո Պերեսը հանդիպել է Ալաբայի հետ և հայտարարել, որ ակումբը չի երկարաձգի նրա ներկայիս պայմանագիրը։
Ավստրիացի ֆուտբոլիստը թոշակի անցնելու ծրագրեր չունի և մտադիր է կենտրոնանալ նոր թիմ գտնելու վրա, որը կարող է առաջարկել գրավիչ ֆինանսական պայմաններ։
Ալաբան Մադրիդ է տեղափոխվել 2021 թվականի հուլիսին՝ Մյունխենի «Բավարիայից»։ Ընթացիկ մրցաշրջանում պաշտպանը «Ռեալի» կազմում անցկացրել է ընդամենը 4 խաղ։