Վրաստանի Ներքին գործերի նախարարությունը 1800 դոլարով տուգանել է ԵԱՀԿ գործող նախագահ և Ֆինլանդիայի արտաքին գործերի նախարար Էլինա Վալտոնենին՝ Թբիլիսիում բողոքի ակցիային մասնակցելու ժամանակ ճանապարհի անօրինական փակման համար։ Այս մասին այսօր հաղորդել է Վրաստանի Առաջին ալիքը։
Երեկ Վրաստանի կառավարության մամուլի ծառայությունը հայտնել է, որ Վրաստանի վարչապետ Իրակլի Կոբախիձեն չեղարկել է ԵԱՀԿ գործող նախագահի և Ֆինլանդիայի արտաքին գործերի նախարարի հետ հանդիպումը՝ երեքշաբթի օրը Թբիլիսիում կայացած բողոքի ակցիային նրա մասնակցության պատճառով։
Ֆինլանդիայի արտաքին գործերի նախարարության մամուլի ծառայությունը ավելի ուշ հայտնել է, որ Կոբախիձեն չի չեղարկել Վալտոնենի հետ հանդիպումը, քանի որ Հելսինկին ինքը չեղարկել էր հանդիպումը՝ նախարարի զբաղված գրաֆիկի պատճառով։ Վրաստանի արտաքին գործերի նախարարությունն արդեն բողոքի նոտա է ուղարկել ԵԱՀԿ-ին։
«ԵԱՀԿ գործող նախագահ և Ֆինլանդիայի արտաքին գործերի նախարար Էլինա Վալտոնենը տուգանվել է 5000 լարիով (մոտավորապես 1800 դոլար)՝ Ռուսթավելի պողոտայի ճանապարհը անօրինական փակելու համար։ Այս տեղեկատվությունը հաստատել է Վրաստանի Ներքին գործերի նախարարությունը», – հաղորդել է հեռուստաալիքը։