Սերբիայի նախագահ Ալեքսանդր Վուչիչը սարսափած է Թուրքիայի վարքագծով, որը զինում է ինքնահռչակ Կոսովոյի Հանրապետությանը հազարավոր կամիկաձե անօդաչու թռչող սարքերով, հաղորդում է ՌԻԱ Նովոստին։
«Ես սարսափած եմ Թուրքիայի վարքագծից և նրա՝ ՄԱԿ-ի կանոնադրության ու ՄԱԿ-ի Անվտանգության խորհրդի 1244 բանաձևի կոպիտ խախտումից, ինչպես նաև Պրիշտինայի իշխանությունների շարունակական զինումից։ Այժմ բացարձակապես պարզ է, որ Թուրքիան չի ցանկանում կայունություն Արևմտյան Բալկաններում և կրկին երազում է Օսմանյան կայսրության վերականգնման մասին։ Սերբիան փոքր պետություն է, բայց մենք հասկացանք ուղերձը», — ասվում է Վուչիչի սոցիալական ցանցերի էջում արված գրառման մեջ։
Կոսովոյի վարչապետ Ալբին Կուրտին չորեքշաբթի օրը հայտարարել է, որ Պրիշտինան Թուրքիայից ստացել է հազարավոր «Skydagger» մարտական կամիկաձե անօդաչու թռչող սարքեր, որոնց մատակարարումը նախատեսված էր 2026 թվականի հունվարին, սակայն տեղի է ունեցել երեք ամիս շուտ։