ԱՄՆ նախագահ Դոնալդ Թրամփը հայտարարել է, որ չի ձգտում դադարեցնել կառավարության աշխատանքը, մտադիր է կրճատել դեմոկրատների ծրագրերը և մեծ թվով դաշնային աշխատակիցների ազատել աշխատանքից։
«Շատերն ասում են՝ «Թրամփն ուզում էր սա»։ Ես չէի ուզում սա», – ասել է Թրամփը One America News-ին տված հարցազրույցում, որի ամբողջական տարբերակը կհեռարձակվի հինգշաբթի երեկոյան։
ԱՄՆ նախագահը նշել է, որ իրեն «թույլատրվում է կրճատել այնպիսի բաներ, որոնք երբեք չպետք է հաստատվեին», և ինքը, հավանաբար, դա կանի։
Թրամփն ասել է, որ դեմոկրատների «սիրելի նախագծերը» կարող են ընդմիշտ կրճատվել։
«Կարող են լինել կրճատումներ, և դա նրանց (դեմոկրատների) մեղքն է», – հավելել է նա։
Մեկ օր առաջ ամերիկացի առաջնորդը Սպիտակ տանը լրագրողներին ասել էր, որ կառավարության աշխատանքի դադարեցումը կարող է հանգեցնել դաշնային կառավարությունում զանգվածային կրճատումների։
«Դեմոկրատները ցանկանում են, որ աշխատանքը դադարեցվի։ Երբ կառավարության աշխատանքը դադարեցվում է, ստիպված ենք կրճատումներ կատարել, ուստի մենք շատ մարդկանց ենք կրճատելու», – ասաց Թրամփը։