Իռլանդիայի հավաքականի գլխավոր մարզիչ Հեյմիր Հալգրիմսոնը հայտարարել է, որ ինքը ստանձնում է Իռլանդիայի՝ Երևանում Հայաստանի դեմ կրած պարտության պատասխանատվությունը և խոստովանել, որ 2026 թվականի ՖԻՖԱ-ի աշխարհի առաջնության որակավորման հույսերն այժմ գրեթե անհնարին են:
Հաշվի առնելով Պորտուգալիայի դեմ առաջիկա բարդ տնային և արտագնա որակավորման հանդիպումները, ինչպես նաև Բուդապեշտ կատարվելիք դժվարին խաղը, սեպտեմբերյան այս փուլը համարվում էր վճռորոշ Իռլանդիայի հույսերի համար:
Շաբաթ օրը «Ավիվա» մարզադաշտում երկու գոլի տարբերությամբ պարտվող դիրքերից 2:2 հաշվով ոչ-ոքի խաղալով՝ Իռլանդիան մեկ միավոր վաստակեց Հունգարիայի դեմ, որը համարվում է խմբում առաջին երկու հորիզոնականների համար անմիջական մրցակից:
Հայաստանի դեմ կայանալիք խաղը համարվում էր պարտադիր հաղթանակի հանդիպում: Սակայն երեքշաբթի՝ սեպտեմբերի 9-ին, իռլանդացիները պարտություն կրեցին խմբի ամենացածր վարկանիշ ունեցող թիմից՝ 2:1 հաշվով:
Սա Իռլանդիայի մոտ այնպիսի զգացողություն է առաջացրել, որ ԱԱ-2026-ի հիմնական փուլ դուրս գալու պայքարը ավարտվել է՝ դեռևս չսկսված: Հալգրիմսոնը խոստովանել է այս ամենը խաղից հետո:
«Այժմ ամեն ինչ պետք է կատարյալ լինի, մենք այլևս սխալվելու իրավունք չունենք: Այս խաղից հետո դժվար է լավատես լինել, որ մենք կմեկնենք Պորտուգալիա և կհաղթենք նման խաղով, ինչպիսին այսօր ցույց տվեցինք:
Երևանում անցկացրած 90 րոպեների ընթացքում գրեթե ամեն ինչ սխալ էր՝ ինչպես պաշտպանությունում, այնպես էլ հարձակման գծում: Կարող եմ ասել, որ Հայաստանն արժանիորեն երեք միավոր վաստակեց: Այսօր մեր խաղում շատ ավելի շատ բացասական բաներ կային, քան դրական, դա հաստատ է»,- ասել է 58-ամյա մասնագետը: