2025 թվականի մարտից ի վեր ռուսական զորքերը գրավել են 149 բնակավայր և ավելի քան 3.5 հազար քառակուսի կիլոմետր տարածք, շաբաթ օրը՝ օգոստոսի 30-ին, հայտնել է Ռուսաստանի զինված ուժերի գլխավոր շտաբի պետ Վալերի Գերասիմովը։ Գերասիմովի հայտարարության համաձայն, որը հրապարակվել է Ռուսաստանի պաշտպանության նախարարության Telegram-ի պաշտոնական ալիքում, ռուսական բանակը գրավել է Լուգանսկի մարզի 99.7%-ը և Դոնեցկի մարզի 79%-ը, ինչպես նաև Զապորոժիեի 74%-ը և Խերսոնի մարզի 76%-ը։
Ռուսաստանի գլխավոր շտաբի պետի խոսքով՝ գարուն-ամառ ժամանակահատվածում Ռուսաստանի զինված ուժերը հարվածներ են հասցրել Ուկրաինայում գտնվող 76 ռազմավարական օբյեկտների, այդ թվում՝ հրթիռային համակարգեր և հեռահար անօդաչու թռչող սարքեր արտադրող ձեռնարկությունների։ Գերասիմովը նաև ասել է, որ ռուսական բանակն իր առաջադրանքները կշարունակի կատարել «հարձակողական գործողություններով»։
Վալերի Գերասիմովը հատուկ նշել է օգոստոսի 28-ին Կիևին հասցված հարվածի մասին, որի արդյունքում ավերվել է հինգհարկանի բնակելի շենք և զոհվել 25 մարդ։ Գերասիմովի խոսքով՝ այդ օրը ռուսական զորքերը հարվածել են «Ուկրաինայի հրթիռային և ավիացիոն արդյունաբերության ձեռնարկություններին»։