Ռուսական զորքերը օգոստոսի 20-ի գիշերը հարձակվել են Ուկրաինայի Սումիի մարզի Ախտիրկա քաղաքի վրա, հայտնել է մարզային դատախազությունը։ Հարձակումն իրականացվել է անօդաչու թռչող սարքերի միջոցով, 14 մարդ դիմել է բժշկական օգնության, առնվազն 13 մասնավոր տուն վնասվել կամ ավերվել է։
Ոստիկանությունը հավելել է, որ վնասվել է մեկ բնակելի շենք, ավտոտնակ և օժանդակ շինություն։ Սերեդինո-Բուդսկայա քաղաքային համայնքում երկու տղամարդ վիրավորվել է անօդաչու թռչող սարքի հարվածի հետևանքով։ Եվս երկուսը վիրավորվել են Նիկոլաևի գյուղական համայնքի վրա անօդաչու թռչող սարքի հարձակման հետևանքով, հայտնել է Սումիի մարզային ռազմական վարչակազմը։
Օդեսայի մարզի Իզմայիլ շրջանի իշխանությունները նույնպես հայտնել են անօդաչու թռչող սարքերի գիշերային հարձակումների մասին։ Նրանց տվյալներով՝ «Շահեդ» անօդաչու թռչող սարքի հարվածի հետևանքով մեկ մարդ վիրավորվել է, և վնասվել են նավահանգստային ենթակառուցվածքները։
Ուկրաինայի արտակարգ իրավիճակների պետական ծառայությունը հայտնել է Օդեսայի մարզի վառելիքաէներգետիկ ենթակառուցվածքների օբյեկտում բռնկված հրդեհի մասին, որի մարմանը մասնակցել են տասնյակ մարդիկ։
Ռուսաստանի պաշտպանության նախարարությունն էլ հայտնել է այս գիշեր ինը շրջաններում ուկրաինական 42 ինքնաթիռ-անօդաչու թռչող սարքերի ոչնչացման մասին։ Գերատեսչությունը նշել է, որ անօդաչու թռչող սարքերի մեծ մասը (14) խփվել է Վորոնեժի մարզում։