Անտառային հրդեհը, որը մեկ օրում ընդգրկել է 16 հազար հեկտար տարածք Ֆրանսիայի հարավում գտնվող Օդ դեպարտամենտում, վերջին 76 տարիների ընթացքում երկրում ամենամեծն է։ Այս մասին լրագրողներին հայտնել է Ֆրանսիայի ներքին գործերի նախարար Բրունո Ռետայոն, որը տարածաշրջան է ժամանել կառավարության ղեկավար Ֆրանսուա Բայրուի հետ միասին։
«Այս հրդեհի հետևանքով 1949 թվականից ի վեր այրվել է անտառի ամենամեծ քանակը», – ասել է նախարարը, որի ելույթը հեռարձակվել է կառավարության X-ի էջում։ 1949 թվականին Ֆրանսիայի հարավ-արևմուտքում գտնվող Լանդ դը Գասկոն լեռնազանգվածում հրդեհը ոչնչացրել է 50,000 հեկտար անտառ և խլել 82 մարդու կյանք։
Ներքին գործերի նախարարության ղեկավարի խոսքով՝ հրդեհի դեմ պայքարում ներգրավված են 2,150 հրշեջ և 600 միավոր տեխնիկա, ինչպես նաև Canadair և Dash ինքնաթիռներ։
«Վաղվանից կմոբիլիզացվեն զինվորականները՝ երեք ուղղաթիռ և մի քանի տասնյակ զինվոր», – հավելել է Ռետայոն։
Իր հերթին Բայրուն նշեց, որ Ֆրանսիան կարող է օգնություն խնդրել ԵՄ մյուս անդամ պետություններից, եթե իշխանությունները հասկանան, որ անկարող են հաղթահարել հրդեհը։ Նա տեղի ունեցածն անվանել է «աննախադեպ մասշտաբի աղետ»։ Օդ դեպարտամենտում հրդեհը սկսվել է երեքշաբթի կեսօրին, իսկ չորեքշաբթի օրը տեղական պրեֆեկտուրան հայտնել է մեկ զոհի մասին։ Եվս մեկ մարդ անհետ կորած է համարվում։ Վիրավորվել է նաև ինը մարդ, այդ թվում՝ յոթ հրշեջ։ Մոտ 2500 տնային տնտեսություն մնում է առանց էլեկտրաէներգիայի։